Tsinyam ni a hkamja lam masa UNHCR kaw na sawk sagawn maram masam

Tsinyam ni a hkamja lam masa UNHCR kaw na sawk sagawn maram masam

Naura Shadang

NIINGNAW, 25-April-2010,

Sunday Malaysia mungdan hta shanu nga ai tsinyam ni a hkamja lam hte seng nna UNHCR kaw na seng ang ai ni kawn sawk sagawn maram masam ai lam galaw wa sai re.

Lai wa sai April (25-26) du hkra lahkawng ya laman KRC rung kaw mung sa du nna, Jinghpaw Wunpawng tsinyam ni a hkamja lam mabyin masa ni hpe tsinyam masha ni hte nan san/htai hkrum shaga mat wa sai re.

San/htai lamang hpe asak (18-24) pang mi, 25 a lahta pang mi garan nna amyu shayi, amyu shadang ginghka let san san, wang lu wang lang hkrum shaga ai hku nna galaw lu sai re.

Ndai sawk sagawn bungli hpe Malaysian Aids Council hta mu gun nga ai Ms. Za Ki kaw nna woi awn wa sai re. Ndai lamang a yaw shada lam gaw tsinyam masha ni hkamja lam hte seng nna tsi tsi hkam la ai lam hta yak hkak lam ni hpe sawk shapraw n-htawm, tsinyam ni hpe grau nna garum shingtau lu na matu re hpe Ms. Za Ki tsun ai hte maren chye lu ai.

Tsinyam ni a matu madung hku nna, Kuala Lumpur, Brickfields hta hpaw ai, ACTS (A call to service) tsi gawk kaw nna lit la tsi tsi ya nga ai raitim, tsinyam masha law law gaw, nga shara tsan ai a majaw mung, hkawm sa hkawm wa yak ai majaw mung, machyi makaw hkrum ni nau n chye sa ma ai lam chye lu ai.

San htai lamang hta tsinyam masha ni tsun wa ai yak hkak lam gaw, machyi makaw hkrum jang gara tsi gawk sa na re atsawm n chye ai lam, tsi tsi manu n dang jaw ai lam, ACTS tsi gawk sa yang mung aten na na la ra ai lam ni hpe tang madun wa sai re.

Ndai lamang hta sa du ai Jinghpaw Wunpawng Tsinyam ni gaw tinang a shani shagu na sak hkrung lam hta hkrum ra ai yak hkak lam ni hpe mung tang madun sai re. Bungli aten law law galaw ra ai hte nta gawk kata matsut matsat nga ra ai masa lam ni mung myit / hkum hkrang hkamja lam lahkawng yan hta dingbai dingna jaw nga ai lam tsun dan wa sai re.

Matut nna mung tsinyam ni law law nga ai lawk hkan e htawt sit tsi gawk (Mobile Clinic) ni galaw ya yang kaja na lam sa du ai tsinyam masha ni hpyi shawn wa sai re.
San htai lamang hta woi awn ai Tsi mu gun ni gaw, kap bra ana HIV, AIDS hte seng nna mung hpaji jaw ai lam law law woi galaw wa sai re.

Ya na zawn san htai lamang galaw lu ai majaw tsinyam masha ni a hkamja lam hte seng nna kade daram akyu pru na ngu ai mahtai hpe gaw kaja wa tatut la yu ra mat wa na re.