Tsinyam ni a du hka tsinyam hpe myit maju jung na matu Asuya hpe shadut

Tsinyam ni a du hka tsinyam hpe myit maju jung na matu Asuya hpe shadut

Naura Shadang
NINGNAW, 20-June-2010

Malaysia Tara Kasa Hpung (Malaysian Bar Council) gaw, tsinyam ni hte mungdan shingbyi ahkang tam ai ni hkrum hkra nga ai hkrit kajawng na zawn re ai mabyin masa ni hpe asu ali myit mang na matu seng ang ai Malaysia Mungdan Asuya hpe shadut dat sai re.

14-June-2010 ya hta Mungkan Wunpawng Shinggyim Ahkaw Ahkang Hpung (United Nation Human Rights Council) hta shang sai Malaysia Asuya gaw, Malaysia mungdan a tsinyam ni a ntsa kanawn mazum ai lam hta, mungdan ga daga a Shinggyim ahkaw ahkang hpunda hte maren rai ging ai nga nna, tsun ndau wa sai re.

Tara Kasa hpung a Tara gram sharai hte laksan ginra komiti tingnyang up Datuk M. Ramachelvam kaw nna Mungkan tsinyam nhtoi hta ya na zawn tsun ndau wa ai re.

Malaysia mungdan gaw Mungkan Wunpawng Hpung a tsinyam lam hte seng ai zuphpawng kaba hta myit hkrum ta masat ka ai mungdan n raitim, Mungdan Asuya gaw UN High commissioner for Refugees (UNHCR) hte rau, shinggyim nau na amu bungli hta, ta gindun nga dingyang re nga nna mung tsun nga ai.

Asuya hte UNHCR a matu, tsinyam ni hpe kanawn mazum ai lam hta grau nna matsan dum chye na hte kam mara roi ai lai len ni yawm mat na matu, htap htuk ai tara masa ni hpe jakrat tawn ging ai nga nna tara kasa hpung ni hpyi shawn dat sai re.

Tara Kasa Hpung (Bar Council) kaw na Asuya hpe hpyi shawn ai nsen gaw;-

(1) Tsinyam ni a asak shim lam hkrit tsang ra ai shanhte a mungdan de bawn ai lai ladat hpe makawp maga ya ai tara hpe ndau ya na matu,

(2) Mungdan kata du nga sai tara shang masat laika n lu ai ni hpe laja lana rim sharen ai lam jahkring ya na matu,

(3) Ma shangai mying jahpan ahkang jaw na matu,

(4) Tsinyam ni shanhte a UNHCR tsinyam laika pa hte hkungran mying jahpan bang lu na ahkang jaw ya na matu,

(5) Muslim tsinyam hte mungdan shingbyi ahkang tam ai ni a dinghku manghkang hte seng nna “Syariah Court” ngu ai Muslim nawku htung hte seng ai tara rung hta hparan lu na ahkang jaw na matu,

(6) Asak 18 ning n-pu na ma kaji ni a matu kan bau hpaji jawng ni hta hpaji sharin lu na matu hte ningtawn ai ramma ni hpe dakkasu, college ni hta matut hpaji hkaja ahkang jaw na matu,

(7) Hkam ja lam hte seng nna Malaysia mungchying sha ni tsi tsi lu ai manu hte maren tsi tsi hkam lu na matu, rai nga ai.

Ref; thestar 20 June.