KRC a lawk gawan, sa du masha yawm

KRC a lawk gawan, sa du masha yawm

Naura Shadang,

NINGNAW, 13-May-2010,

Sr. Labang Naw Seng woi awn ai hte KRC E.C ni a lawk gawan ai lamang (Site Visit) hpe lai wa sai April shata praw kaw nna hpang wa sai re.

2010 ning Feb (18) hta shawa ra lata poi ngut ai hpang March shata kaw nna mu gun nnan ni KRC rung bungli hpe lit la hpang wa sai raitim, UNHCR a htawt sit mying jahpan hta ai lamang (Mobile Registration) nga mat ai majaw kalang ta n lu pru ai rai nna, April shata hta she lawk gawan ai lam hpe hpang lu ai re hpe chye lu ai.

Lawk gawan ai lam hta, lam amyu myu a majaw KRC Rung de jahkring hkring n lu du ai myu wunpawng sha tsinyam ni hpe chye mai ai shiga (information) garan ai lam madung galaw ai re.

KRC kaw na galaw nga ai UN tsinyam hte seng ai lam, shimlam, hkamja lam, hpaji lam, hte seng ai shiga ni hpe tsun dan ai hte shawa kaw na ra sharawng ai lam shawa nsen hpe mung ahkyak tawn, hta shinggyin ai lam rai nga ai.
Lai wa sai shaning na hte shingdaw yu yang dai ning na lawk gawan ai lam hta shawa masha sa du ai lam yawm mat ai hpe mu lu ai hku re. "Ndai zawn yawm mat ai gaw shawa law law UN tsinyam masat lakmat lu mat ai majaw rai na re" nga nna KRC mu gun langai tsun wa ai.

Bai nna, pu kan magam bungli shakut shaja galaw sha ra ai majaw aloi ali n lu sa du lawm ai mung rai na re. "UN tsinyam lekmat lu sai nga nna tinang hkrai bungli galaw sha nna seng ang ai de matut mahkai lam n galaw mat yang gaw myit mada ai lam ni hpring tsup lu na n loi na re" nga nna shi matut tsun wa ai.

Hpa majaw nga yang UNHCR a masing gaw aten ladaw hta hkan nna galai shai chye ai majaw re hpe chye lu ai. UN tsinyam masat lu ai hte sha numbat 3 mungdan lu sa na n rai nga ai. San / htai ninggam shagu hpe pri nem ai hte htai awng lu na matu gaw seng ang ai tinang a tsinyam rung de dingyang matut mahkai lam galaw na ahkyak nga ai. Shing n rai yang myit mada ai yaw shada pandung de du lu na n loi ai hpe chye lu ai re.

KRC a lawk gawan ai lam hpe April shata praw kaw nna May shata 17 ya laman hta Bangsar, Ampang, Mont Kiara, Setapak, Kepong, Damansara, Penang hte Jahor shara ni hta gawan ngut sai lam chye lu ai.