Tsawra ai Malaysia na manang wa hpang de

De,

Tsawra ai manang wa hpang de, Wunpawng buga shara mi kaw nna myit shingran let, n dai laika hte shakram dat n ngai.

Manang wa e, nang chyawm gaw sumtsan Maigan du, bungli kaja lu. Shingnip kata dung computer sha jum rai nga na hpe kam ai. Nang du nga ai Malaysia Mungdan hpe masha ni tsun jahta ai hpe sha na yu nna n du ga tim anhte Mungdan hta lam shagu rawtjat galu kaba ai Mungdan rai na hpe myit shingran mu n ngai. Dai majaw Wunpawng buga na Ramma ni hkying hku nna sadu nga ai lam hpe mung na lu ai. dai lam ni gaw kaja teng na re i? hpa majaw nga yang Wunpawng buga ginra hta lam shagu yak hkak, dinghku kata na mayak, tinang a shawnglam mayak hpe lawt lam tam let pru mai ai chyinghka hku nna matsut je pru wa ai hkrai rai na hpe kam ai. Gara masa lam hku nna pru pru, du du n sin kata na pru nna Mungkan hpe loi sha gaw mu lu ai ni rai na sai kam ai.

Anhte Mungdan, anhte buga hte gaw lam shagu, wa shakap shai rai na re ngu shadu ai. James Bond sumla hkrung langai mi kaw Malaysia Kuala Lumpur na Twin Tower hpe mu dat n ngai. Grai hkik hkam ai (wa hpang) tower kaba re hpe mu lu n ngai. Ngai mung masha n lu du tim myit shingran hku nna gaw Mungkan hpe shinggrup taw nga n ngai. Galoi she du lu na kun nchye ai.

Manang wa hte Malaysia du Wunpawng Ramma n kau mi gaw mungkan jut shara shagu de du lu ai gaw Karai Kasang lajang ai lam re yaw. Anhte Wunpawng buga gaw lam shagu shaman chyeju hpring ai lamu ga re. Raitim anhte hpa rai matsan mayan rai nga ai kun? Madung gaw hpaji n chye ai majaw rai kun? Anhte a jinghpaw ga malai langai mi nga ai “n lu ai hta n chye ai gaw yak htum” re da. Dai ni Nye hkum ngai nan dai hku sha myit lu ai. n chye ai majaw chyelu, mu lu na matu, daini anhte sharin la lu na matu nanhte manaw manang ni gaw Wunpawng yawng a gawng malai re ai yaw.

Nga len, nga nan, nga pyaw mat ai ni n rai u ga yaw. Malaysia kaw na kaga mungdan de resettlement program hte du hkawm mat wa na Wunpawng Ramma manang wa e lani mi na n-htoi hta anhte a mungdan anhte a buga hpe anhte lata hte anhte nan gaw gap la ra na re ngu ai hpe dum u yaw.

Anhte amyu sha ni gaw Manau nau ai ni re majaw Nau Shawng wa hpe sha yu chye ai. Dai ni na mungkan gaw Rap ra ai mungkan she rai mat sai. Yawng gaw Rap Rap Ra Ra rai ka ra ai prat rai mat sai hpe dum shajang ga yaw.
Tsun mayu ai gaw Ningbaw ngu ai ni hpe hkrai n yu ai sha, tinang nan mung Ningbaw hku nna hkam la let bungli lam shagu hta lit la chye ra saga ai lam hpe tsun mayu ai .

Manang wa hte Wunpawng Ramma ni yawng lani mi hta Wunpawng Buga de bai du wa na a ten kaw Wunpawng Mungdan hte Amyu sha yawng a matu hpaji langai hpra la wa nna naw kaji kadun nga ai anhte Wunpawng Amyu ni hpe lam woi ningshawng tai lu hkra grai shakut ga yaw. Grai mung kam kaba taw nga n ngai.

Tsun jahta mayu ai lam ni gaw grai naw law la ai re wa, raitim anhte mare buga gaw nang chye ai hte maren mihprap wan n nga ai majaw Wan shadaw sha lu lang ai. Dai ni tup yi kaw mam ting nna grai ba la ai. Yi hkan mung kanu kawa sak kung ni she law la ai yaw. Yi ngam kaw tsap lu na Ramma ni law malawng wa Ka-ni lu sha chye ai ni hkrai she rai ma sai oi. N dai lam gaw yawn hpa shi ga re, n kam tsun tim gara hku shading sharai na ngu ai hpe manang wa chye lu na matu tsun dan ai lam re.

Manang wa e…… Wan shadaw mung htum wa sai. Hpawt de jau jau yi de mam ting bai sa ra ai majaw nye lai ka hpe n dai kaw naw da sai yaw. Tsaw ra ai manang wa hte Wunpawng sha ni yawng Awng dang ai hkrun lam hta tsap lu mu ga.

Manang,
Bum Sinwa
Shagawng bumga, Wunpawng Mungdan