Shayi atsam shapraw na KRC amyu shayi ni a kanbau lata hpaji masing

Shayi atsam shapraw na KRC amyu shayi ni a kanbau lata hpaji masing

Naura shadang 24-May-2010 (Mon),

KRC, "AMYU SHAYI Women Project" masing a shawng ningnan lang na ninggam hku nna Wunkat (Training) hpe ninghtoi 24-May-2010 ya shani kaw nna Setapak lawk hta hpang wa sai hku re.

Tsinyam amyu shayi ni a nta nga let, shang gumhpraw tam lu na matu yaw shada let UNHCR a bawng ring masing langai rai nga ai Social Protection Fund (SPF) kaw na garum gumhpraw RM 12,000.00 jahkrat ya ai hte ndai AMYU SHAYI Women Project hpe galaw sa wa lu ai rai nga ai. Ndai project hpe 1. Jak chywi (Sewing), 2, Lata sama amu (Cross stict & Fancy) hte 3. Za hkri (Knitting) ngu nna lawng lam masum garan let galaw na re hpe chye lu ai. Jak chywi ai hpe Shy. Nang Doi, Lata sama amu hpe Jan. Mary Seng Bu hte Za hkri ai hpe Jan. Mayram Wadan ni kaw nna lit la sharin ya mat na re hpe chye lu ai.

Project a madung yaw shada ai lam gaw Jinghpaw Wunpawng tsinyam amyu shayi ni lata hpaji chye chyang kung kyang wa na matu hte bungli kata (jobless) manghkang ni hpe hparan lu na matu rai nga ai.

Ndai Amyu shayi project hpe kade daram du hkra yaw shada let, lahkam sa wa na rai? ngu nna, ndai project a lithkam hte Amyu shayi hpaawn rai nga ai, Saranum Grace hpe san yu ai shaloi,
"Ya gaw anhte shawng ningnan hku nna Nu num ni ndai lata amu hta kung kyang wa hkra wunkat jaw na. Dai hpang jak rung hkan na order ni hpe matut mahkai tam la nna lit la chywi na. Anhte nan mung gyin shalat galaw shapraw na. Anhte a Nu num ni galaw ai arai ni hpe maigan gat lawk de du hkra dut shabra na myit mada ai. Ndai Malaysia kaw mung nawku hpung ni hte kaga dinghkrai ra ai ni order htet yang manu hkyem sa ai hte lit la galaw ya mat na re." nga nna tsun htai dan wa ai.

Ndai bungli masing gaw kaja wa awng dang wa lu na re ngu kam ai kun? ngu nna bai san yu yang, "Ya ndai Women Project hpe kaga tsinyam hpung ni mung galaw nga ma ai. Yawng gaw Myen mung na sa ai hkrai re majaw idea bung nna galaw shapraw ai kunrai mung nau wa n shai ai hpe mu lu ai. Gat lawk hta shang lu na matu anhte Jinghpaw Nu Num ni gaw lak lai ai nyan, zai ladat shaw nna galaw lu yang gaw teng sha awng dang na re ngu kam ai. Ndai Setapak lawk kaw awng dang ai hpang kaga lawk ni de mung anhte matut galaw sa wa lu na matu yaw shada tawn ga ai." nga nna matut tsun htai dan wa sai.

Lai wa sai May shata a Kanu masat laban nhtoi hta gaw, MKBC nawku hpung kaw nna htet ai hte maren, htingba (hand bag) 100 hpe, langai a manu RM- 13 hte Amyu shayi hpung ni hku nna lit la galaw ya lu sai lam chye lu ai. Matut nna mung jawngma ni a matu jawng labu palawng hpe bai lit la chywi ya na re lam chye lu ai.

Shawng nnan pang hta sharin hkam la ai Nu Num ni kung kyang ai hpang gaw shinggan gat lawk tam nna ta tut bungli galaw sa wa na rai nna, shang lawm ai Nu Num ni mung tinang galaw lu ai kaw na akyu amyat hpe tsa lam shadang hta hkan nna akyu hkam sha lu na re hpe chye lu ai. UNHCR gaw Social Protection Fund (SPF) ngu ai masing hte tsinyam uhpung ni yawng hta tinang lagaw tinang tsap nna rawt jat galu kaba wa na hpe myit mada let garum ai lam rai nga ai.

SPF kaw nna jaw ai ndai arang gumhpraw hpe n shamat ai sha matut nna law htap wa hkra tam shakut nhtawm, tinang tsinyam hpung kata na dinghku ni yak hkak ai lam hpe hparan lu na shanhte myit mada nga ma ai re. Lai wa sai 18-May-2010 ya shani UNHCR kaw na SPF Project a yu reng jep chyoi mugun langai rai nga ai Ms. Katrina mung Setapak ginra hta shawng galaw hpang wa na ndai Amyu Shayi Women Project a tau hkyen lajang ai lam ni hpe sa du masam maram nhtawm, Setapak Nu Num ni hpe mung n-gun jaw ga sa tsun wa sai re.

Ndai Amyu Shayi Women Project sha n-ga KRC a bawngring masing (Development Project) langai rai nga ai Computer Wunkat mung UNHCR a SPF Project kaw na garum shingtau ai hte galaw nga ai re hpe mung chye lu ga ai.