Malaysia - Jinghpaw Wunpawng Tsinyam Hpung Shiga: 2010

Mali hka hte Ta Ping hka mazup hta tara n shang ja lagu htu nga

Mali hka hte Ta Ping hka mazup hta tara n shang ja lagu htu nga

BBC, Thur, Nov 4, 2010

Jinghpaw mungdaw, Manmaw Ginwang kata na Mali hka hte Ta Ping hka lapran hta Man Te, Kyun Gyi, Maing Ka, Nyawng Kung, Alay Su, Kam Ni, Kung Hka, Man Pin ngu ai kahtawng (8) nga ai rai nna, Mali hka hte Ta Ping hka mazup makau hte ni dik ai kahtawng (2) gaw Man Te hte Kyun Gyi kahtawng ni rai nga ai.

Ndai mazup makau grupyin na ja lawm ai zaibru ni hpe marawp shaw lu na matu jak hkum sumhpa shakap tawn ai Jak li (10) hte tara n shang ja htu ai lam ni galaw nga ai majaw hka lam ni hten nna mare kahtawng ni de hka pe mi daram du hkra lung wa ai majaw mare kahtawng mat na buga masha ni tsang nga ma ai re.

Ya na zawn jak arung arai ni shakap tawn ai Jak li (10) hte tara n shang ai sha laja lana ja htu nga ai gaw Manmaw mare hta Myen Du Salang ni hte ni kahtep hkau chyap ai ni rai nga ai.

Manmaw Mare na Myen Du Salang ni gaw, Ginwang ra lata poi komisin a matu alu gumhpraw ra ai nga nna ndai ja htu ai hpaga la ni kaw na lani mi a matu Kyats sen (10) mayun kumhpa sha nna n chye masu su ya nga ai re.

Dai ning na August shata hta sha mung dai ginra makau na tara n shang ja htu ai Jak Li (20) jan hpe seng ang ai ni kaw na rim ahkyak la wa sai re.

Ya ten tara n shang ja htu nga ai ni kaw na mayun kumhpa sha nhtawm, n chye masu su ya nga ai lam a ntsa shawng e rim hkrum ai hpaga la ni myit ndik nga ai zawn, buga masha ni mung mare kahtawng ting hka lim mat na hpe tsang nga ma ai re.

Ya na zawn tara n shang ja htu ai bungli hpe shani kaang ten e dan dan leng leng galaw na ahkang n nga ai majaw, shana ten e galaw ai gaw lai wa sai October shata praw kawn ya du hkra matut manoi re hpe chye lu ai.

Ru di; http://www.bbc.co.uk/burmese/burma/2010/11/101104_panforgold.shtml

UN kaw na manu jahpu n la ai hkamja lam jep chyoi ya na

(I) UNHCR-Malaysia Rung hta Interpreter galaw na myit lawm ai ni bungli shawk ga

Wed, Oct 27, 2010

Malaysia UNHCR Rung hta Interpreter amu shara law law a matu hkyak hkyak ra nga ai hpe chye lu ai.

Myit lawm ai ni Num/La kadai raitim, KRC de aten dep matut mahkai wa ga. UNHCR Card lu da sai ni kadai raitim shawk shawn mai ai hpe chye lu ai.

Shawng nnan KRC kaw na bungli shawk san/htai laika pa hpe shawng sa ka jahpring da ra na re.

Ningtawn dik htum marai (20) hpe lata nna UNHCR de sanhtai lamang a matu matut shalai dat na re.

Hkum tsup chye mayu yang KRC Phone;- 0321450430 de matut mahkai mai ai.

(II) UN KAW NA MANU JAHPU N LA AI HKAMJA LAM JEP CHYOI YA NA

Du wa na October 30, bat (6) ya shani, jahpawt manap hkying 9:00am kaw nna nhtoi lani mi tup tsinyam ni hpe UNHCR kaw na manu jahpu n la ai sha hkamja lam jep chyoi ya na hpe chye lu ai.

Kadai raitim, kaning re ai ana ahkya raitim sa jep mai ai lam chye lu ai.

Shara gaw Jalan Utara lam ntsa na Kalavirthy Sangam ngu ai shara hta rai nga ai.

Sa mayu ai ni lam atsawm n chye ai rai yang Patrick, Ph. 012 9239 374 hpe matut mahkai mai ai.

Hkau chyap ai ni nga yang lawan shana wa marit

Hkau chyap ai ni nga yang lawan shana wa marit

Tuesday, October 26, 2010, 10:05 pm

UN Mying;- Buwang Tawng (UN ID: 354-08C03709) hpe UNHCR kaw na tam nga ai.
3rd-Nov-2010 hta New Zealand mungdan de pru na re.
Ya du hkra matut mahkai n lu taw ai.
Jaw da ai phone nambat mung matut mahkai n lu ai.

Hku hkau ai manaw manang jinghku jingyu ni nga ai rai yang KRC de lawan shana wa marit.

KRC

Bungli hta wan hkru hkrum ai Wunpawng Tsinyam (2) saw sawn di hkrum

Bungli hta wan hkru hkrum ai Wunpawng Tsinyam (2) saw sawn di hkrum

Naura Shadang, Sat, October 23, 2010

Malaysia mungdan, Kuala Lumpur, Setapak lawk, Genting Klang lam ntsa na “Chong Fatt” Miwa lusha seng kaw bungle galaw nga ai Wunpawng tsinyam (2) gaw bungli hta wan hkru hkrum ai raitim, bungli madu ni kaw na lit n la ai sha n-ga, tsi rung mung sa ya ai lam n nga ai hpe chye lu ai.

W

an hkru hkrum ai Slg. Chang Hpung (29) ning hte Shd. Gum San Awng (28) ning gaw lai wa sai October (9) ya, bat (6) ya shani Lu sha seng a shat gawk hta bungli galaw nga ai ten shat gawk na Gas dum lawng kapaw nna kaga Malaysia-Miwa bungli masha marai (3) hte rau wan hkru hkrum ai re.

Lusha seng na shat gawk hta Gas wan dap (5) nga ai hta na (1) gaw ra rawng ai lam nga ai ngu Lauban hpe jau tsun da tim lawan byen ai lam n nga ai sha, manghkang byin ai shani she bungli ten e kaga wan mang ni hpe lang nga yang byeng ai ten papaw hkru ai re lam chye lu ai.

Gas dumlawng kapaw ai ngut ai hpang Seng madu ni gaw, Balik dap madi shadaw laika ni galaw lang nna, shanhte a mungchying sha marai (3) hpe Kuala Lumpur Mung shawa tsirung kaba de tsi rung mawdaw shaga nna htaw sa mat ai raitim, Wunpawng tsinyam (2) yan hpe gaw ngam da ma ai.

Dai ten e bungli rau galaw ai kaga Malay-Miwa dingla wa gaw shi a mawdaw hte ni nawn ai tsi gawk de sa sa ya ai raitim, tsi gawk kaw na n hkap la ai sha, tsirung kaba sa na matu matsun dat ma ai.

Tsi gawk kawn matut nna, Kuala Lampur Chowkit tsi rung kaba de matut sa ai shaloi tsi rung kaw mung Balik dap madi shadaw laika n lu ai nga nna ahkyak tsi gawk (Emergency room) de n jashawn ai sha shinggan kaw la da shangun ma ai.

Tsi rung kaba de hkan nang ai bungli kaw na manang Shd. La Raw gaw, Chowkit Balik dap de tsi rung lung na madi shadaw laika wa hpyi ai shaloi Balik dap kaw na mung mabyin hpe san jep nhtawm, shi hpe madaw daru hta dat nna hkying hkum (3) daram la nna tawngban jang she madi shadaw laikapa jaw dat ma ai.

Shana de hkying 3 daram kaw na tsi rung du taw tim, yuptung hkying 12 jan ai hpang she tsi tsi ahkang lu ai re. Jahpawt hkying 4 aten daram hta Balik Kai Chyan ni Shd. La Raw hpe bai shaga nna mabyin hpe azin ayang bai san jep la tim bungli madu hpe ahkyak la ya ai lam n nga ai.

Bungli madu mung, wan hkru hkrum ai Wunpawng tsinyam 2 hpe n chye ai ngu tik tik ningdang ai hpe chye lu ai.

Balik dap de madi shadaw laika wa hpyi ya ai Shd. La Raw hpe mung bungli shapraw kau hkrum ai re.

Bungli madu kaw nna shi a bungli hta hkala nba hkrum ai tsinyam (2) a matu tsi tsi manu hte bung lat gumhpraw (Compensation) jaw ai lam n nga ai.

Wan hkru hkrum ai marai 2 kaw na Slg. Chang Hpung gaw tsi rung 3 ya rawng nna le nhtawm nta kaw bai matut tsi tsi taw sai rai nna, Shd. Gum San Awng gaw nhtoi (15) ya tsi rung rawng nna, October 23 ya shani she tsi rung na lu yu ai re.

Malaysia mungdan hta Myen mung tsinyam ni gaw seng ang ai Malaysia Asuya kaw na tara shang bungli galaw ahkang n jaw ai majaw, pu kan a matu bungli madu ni hte jahkrum nna bungli galaw wa ai shaloi Tara Upadi makawp maga ya ai lam n lu ai majaw ya na zawn shagrit katut ai lam law law rai nga ai.

UNHCR kaw na gaw Malaysia Asuya hte jahkrup nna, Myen mung tsinyam ni hpe tsinyam masat lekmat ni jaw tawn ai raitim, UN lakmat lang da ai Myen mung tsinyam ni gaw jahkring hkring Malay Balik hte Rela ni rim sharen da ai lam ni hpe hkrum hkra nga ai re.

Greenland Hkai sun masing hpang wa sana

Greenland Hkai sun masing hpang wa sana

Sara Gana, Wednesday, October 20, 2010

Tsawra ai Jinghpaw Wunpawng myusha ni hpang de shachyen ya mayu ai lam langai hte rau, akyu hpyi garum na lam lajin dat ai.

Karai Kasang a chyeju majaw maigan mungdan kaba de lahkam sa wa na matu Malaysia kaw du nga ai laman hta anhte Wunpawng myusha ni a shawnglam a matu, dawhpum dawnu tai ya na KRC Rung hpe lu la ai majaw chyeju shakawn n ma rai nga ai.
Yak hkak lam amyu myu hpe shakut shaja let garum ya nga ai rung langai mung rai nga ai. Ya dai ni na ten hta mung, UN kaw na anhte Wunpawng myusha ni a matu yaw shada let, KRC rung de Project langai lit shatsam dat ai lam hpe shachyen dan mayu ai.

Ndai project gaw hpa i nga yang, hkai sun galaw ai lam rai nga ai. Ya ten hta UN kaw na anhte Wunpawng myusha ni hpe kam let lit shatsam dat ai ndai amu hpe tatut hkrang shapraw sa wa na ga ai.

Anhte hpe ndai zawn lit shatsam ai gaw, Wunpawng myusha ni hpe kam ai myit hte galu kaba shangun mayu ai majaw rai nga ai. Ndai project hpe 2010 November (7) ya shani kawn, Ampang makau kaw ta tut galaw sa wa na ga ai.

Ndai hkai sun kaw namlaw namlap ni hpe madung hkai sa wa na matu ga sau kaja ai shara hpe UN ni kaw na lit la let shap masat da ya nga sai.

Ndai amu magam galaw ai marang hta anhte Wunpawng myusha ni lu la na akyu gaw;- (1) UN kaw na kam hpa let shatsam ai lit hpe tatut hkang lu shapraw ai majaw Wunpawng myusha ni ntsa kam ai myit grau jat wa na. (2)Anhte a dawhpum dawnu rai nga ai KRC rung hpe maga mi de na madi shadaw lu na re.

Hkai sun project a ntsa yaw shada da ai lam gaw;
1. Shatmai nam law namlap ni hkai nhtawm, anhte a wuhpung wuhpawng hpe garum madi shadaw na.
2. Wunpawng myusha ni Malaysia kaw lamu ga shara madu da lu na.
3. Tsinyam lam hku nna yakhkak nga ai lam hpe mung tatut htawng madun dan lu na.
4. Kyu hpyi bum hku nna mung akyu jashawn lu na.
5. KRC wuhpung hku nna mung bungli masing langai jat galaw lu ai lam ni rai nga ai.

Ndai hkai sun masing bungli komiti hta
1. Sara Nathaniel (Incharge of Farm Project)
2. Ah Sein (Accountant)
3. Brang Nan
4. Naw Ja
5. Brang Seng ni ta tut hkrang shapraw galaw sa mat wa na re.

Hkai sun kaw na pru ai shatmai nam law nam lap ni hpe Pasa Malam hte Salayang shatmai gat ni hta mung dut shabra nna, lu la ai akyu amyat hta na 50% hpe gaw tatut bungli galaw ai ni hpe akyu hkam sha shangun na rai nga ai.

KRC kaw nna gaw tatut bungli galaw na ni hpe shata shagu n-gun buri mi garum madi mat wa na re. Ndai project gaw anhte a tsinyam masha loi mi hpe bungli jaw lu ai lam mung rai nga ai.

Ndai hkai sun project gaw UN a Social Protection Fund (SPF) ngu ai bungli masing kawn garum ai lam rai nga ai. Shawng de SPF kaw na KRC la ai project ni gaw Computer Wunkat hte “Amyu shayi” Women Project ni rai nga ai.

Dai ni ndai hkai sun Project galu kaba awngdang wa na matu gaw anhte Wunpawng myusha ni yawng myit hkrum mangrum let, kabu gara ai myit hte Karai Kasang kaw akyu hpyi garum nga ai rai yang mau hpa chyeju hpe hkam la na re ngu kam let Wunpawng myusha ni yawng hpe garum hpyi saw lajin dat nngai.

USA kawn, Jinghpaw Wunpawng Tsinyam ni hpe uhpung hku tsinyam masat mat wa na daw dan

USA kawn, Jinghpaw Wunpawng Tsinyam ni hpe uhpung hku tsinyam masat mat wa na daw dan

7-10-2010 (Thursday)
Naura Shadang

Jinghpaw Wunpawng tsinyam ni hpe American mungdan kawn tsinyam masat hkap la ai lam hta uhpung hku masat hkap la mat wa sana re lam hpe August (17) ya hta galaw ai UNHCR-Malaysia hte tsinyam ningbaw ni a zuphpawng shiga hte maren chye lu ai.

American Asuya a Policy hta tsinyam ni hpe shanhte a mungdan de shaga la ai lam hta hkum dingdek (individual) hte uhpung (group) hku ngu nna hpan lahkawng garan let galaw nga ai re.

Lai wa sai aten hta Hpunau Hkang amyu ni chyu sha uhpung hku tsinyam masat hkrum ai rai nna, Jinghpaw Wunpawng tsinyam ni gaw ya she masat hkrum ai lam rai nga ai.

Ndai hku masat hkrum ai a marang e hkam la lu na akyu gaw Jinghpaw Wunpawng tsinyam ni law law America mungdan de sa lu na ahkaw ahkang pru wa na rai nga ai.

Raitim mung, ndai masing hta, UNHCR-Malaysia kawn 2010 August (17) ya a shawng daw de tsinyam masat tawn sai ni sha rai nhtawm, ndai hpang daw de tsinyam masat lu la na ni gaw hkum dingdek hku bai rai na hpe chye lu ai.

America mungdan gaw shaning shagu Mungkan grup gra na tsinyam masha 75,000 (mun sanit hkying manga) hpe hkap la nga ai rai nhtawm, dai hta Asia mungdan na gaw 17,000 (mun langai hkying sanit) lawm nga ai.

Myenmung tsinyam ni kaw na gaw shaning shagu tsinyam masha 4000 (hkying mali) hpe hkap la nga ai rai nna dai ning gaw htap lahkawng jan 8000 hte 10,000 lapran hkap la mat wa na re majaw kaga mungdan yawng hta dawn jan dik htum mai byin wa ai lam chye lu ai.

Matut nna, shanhte a mungdan de tsinyam hkap la ai ladat hta mung myu baw sang tsinyam hpung ni a masha jahpan hta hkan nna tsa lam shadang (%) hku hkap la mat wa na re hpe kahtap chye lu ai.

December 24-26 laman Cameron Highlands hta galaw na MKBC Hkrismat hta Miss MKBC 2010 shingjawng poi hpe mung galaw mat wa na.

Naura Shadang
15-September-2010

Malaysia Jinghpaw Wunpawng Hkalup Hpung (MKBC) Hkrismat hpe du wa na December 24-26 laman nhtoi (3) ya Cameron Highlands kaw galaw sa wa re lam hpe nawku hpung shiga lawk hku nna chye lu ai.

Sa mayu ai ni tinang hte ni nawn ai shara kaw na Hpung lawk lithkam ni kaw November 24 hta hpang n hkrat ai sha mying jahpan bang mai ai lam hpe mung chye lu ai. Marai langai a matu, RM - 150 hkrat ang na rai nhtawm, marai lahkawng rai jang gaw, RM - 365 ang ai hpe chye lu ai.

Ndai Hkrismat hta "Miss MKBC 2010" lata shingjawng poi hpe mung galaw sa mat wa na re kahtap chye lu ai. Asak 16-28 lapran na amyu shayi sha ni shang shingjawng na matu myit lawm ai rai yang September (5) ya kaw nna lawk lithkam ni kaw mying jahpan bang laika hkrang "Form" mai lu sai lam chye lu ai.

Lawk lithkam ni a mying hte matut mahkai na phone nambat ni shinggyin madun dat ai.

Sara La Wawm (Bukit Bintang)...........0123845663
Slg.Maran Awng Mun (Setapak).........0166282438
Slg. Mahkaw Tang Gun(Johor)............0167988155
Slg.Dingsa Seng Lawn (Kepong).......0122462267
Slg.Zatau Hkawng Dau(Hartamas).....0146672476
Slg.Lahpai Zau Tawng(Hartamas)......0173546543
Jan Ndau Hkawn Zet(Mont,Kiara).......0162591651
Lahpai Zau Hpang(Penang)................0164854253
Slg.Gam Ba(Damansara Uptown)......0126048405
Shadan la Ring (palanggyi).................0179267118

2010 Ning KRC Mugun Ladaw Shata (6) Hpring Chyeju Shakawn Kyu Hpyi Hpawng Galaw La Lu

Naura Shadang
23nd-August-2010

Malaysia - Jinghpaw Wunpawng Tsinyam Hpung a 2010 ning Mugun ladaw shata (6) hpring chyeju shakawn kyu hpyi hpawng hpe KRC Rung nta hta lai wa sai 21st-August-2010 ya shana de hkying 7:00pm aten e awng dang ai hte galaw la lu sai re.

Ndai chyeju shakawn hpawng hta Hpawng hpaw akyu hpyi ai hku nna Rawang Fellowship Nawku Hpung na Pastor Ah Dee, Tingnyang Up hku nna, MCF-Hatamas a Pastor Sara Tangbau Ma Brang hte Mungga hku nna MKBC a Hpungup Sara Rev. Dingshu La Hkawng ni woi awn ya wa sai re.

Jinghpaw Wunpawng Tsinyam Hpung kawn chyeju shakawn kyu hpyi lawm na matu tang shana mat wa ai lam ni gaw lawu na hte maren rai nga ai.
1. Shata (6) ladu hkrum hkra woi awn wa ai Karai Kasang hpe chyeju dum ai lam,

2. 2010 ning March shata hta hkam la lu ai tsinyam lekmat 400 jan a matu chyeju shakawn ai lam,

3. Computer Project a matu,

4. KRC a galaw nga dingyang magam bungli rai nga ai hkamja lam, shimlam, hpaji lam, ma kaji ni hte amyu shayi lam ni a matu,

5. KRC hta shawng lawm apnawng nga ai mu gun ni yawng hkamja zet tsang ai hte mu gun lu na matu,

6. Malaysia hta nga nga ai Jinghpaw Wunpawng myusha ni yawng hte maigan mungdan de chyam bra nga ai myusha ni yawng a matu,

7. Romania de du nga ai Wunpawng tsinyam ni a matu,

8. Myen mungdan ngwi pyaw simsa wa lu na matu akyu hpyi myit dum na lam saw lajin mat wa sai re.

Ndai chyeju shakawn hpawng hta Hpaji dap mugun sara/saranum ni, lawk hpaawn ni hte ni nawn ai htingbu htingpyen na myitsu salang ni yawng 50 daram sa du chyeju shakawn lawm sai re.

Malaysia-Singapore na Jinghpaw Wunpawng sha ni a No. (1) lang na amyu sha lam yan zuhpawng galaw lu

Uma Shing Tai
3rd-August-2010

Malaysia Mungdan du Jinghpaw Wunpawng Myu sha ni hte Singapore Mungdan du Jinghpaw Wunpawng Amyu sha ni a gawng malai J.L.H Ningbaw ni a No.(1) lang na Amyu Mungdan ngang kang wa lu na lam shawng lam masing bawng ban hpawng hpe Malaysia mungdan Kuala Lumpur Mare Daju, Pudu Plaza kaw na (COBEM) Ginra hta 25-July-2010 laban shana 8:00pm aten hta ngwi pyaw awng dang ai hte galaw la lu sai lam chye lu ai.

Ndai zuphpawng lamang hpe Malaysia kaw du nga ai Jinghpaw Wunpawng Amyu sha myu tsaw mung tsaw ningbaw ningla ni hte uhpung uhpawng shagu na myitsu salang ni kawn shawng nnan ninghtoi 4-July-2010 ya shani na zuphpawng hta shabyin shatai Komiti hpaw let galaw sa wa ai re lam chye lu ai.

Zuphpawng a madung yaw shada ai lam gaw maigan du nga sai Jinghpaw Wunpawng myu sha ni yawng grau nna shada myit hkrum let amyu hte mungdan a shawng lam gam maka ngang kang wa na lam hpe myit hkrum mang rum let jawm makawp maga mat wa na lam rai nga ai.

Bai nna, ndai zuphpawng gaw Malaysia - Singapore du Jinghpaw Wunpawng myu sha ningbaw ni pawng hpawm galaw ai No. (1) lang ngu na amyu sha lam yan zuphpawng mung re lam chye lu ai.

Ndai zuphpawng kawn, ta tut hkrang shapru woi awn wa na Komiti mugun ni hpe mung, myit hkrum shagrin da lu sai rai nna Amyu Wunpawng sha ni a matu ahkyak dik ai shawng lam magam bungli masing (Statement) masum hpe mung myit hkrum shagrin da lu sai lam chye lu ai.

Zuphpawng hta myit hkrum daw dan la lu ai lam masum gaw;- (1) Amyu sha lam hta tinang hkum hkrang atsam hte shang lawm lu ai ni shang lawm na, (2) Mung masa lam a majaw yak hkak ai tinang amyu sha tsinyam ni hpe dang di lu ai daram ja gumhpraw hku nna garum madi shadaw na lam hte (3) Galoi mung amyu hte mungdan a matu akyu hpyi garum ya na lam ni re hpe chye lu ai.

Ndai daw dan shagrin da lu ai lam yan (3) hpe ta tut hkrang shapraw na lit gaw maigan du Jinghpaw Wunpawng amyu sha ni yawng a lit re ai lam hte jawm shakut sa wa ra ai lam hpe mung lit nga ai Komiti myit su ningbaw ningla ni kaw nna tsun shana ga saw dat ma ai re.

Maigan du Jinghpaw Wunpawng sha ni aten shachyut nna pu kan magam bungli galaw lu galaw sha ra ai raitim amyu sha lam hte seng nna hpawng chyawm ai ndai zuphpawng hta shawa n-gun 100 daram sa du shang lawm ai kaw amyu shayi ni mung tsa lam shadang 30 daram su du bawng ban lawm ai hpe mu lu ai.

KRC

Wunpawng Myusha ni law, Malaysia ngu ai mungdan kaw
Wunpawng Mungdan hpe kau da, Malay ga de hprawng sa wa,
Chye ai hku mi tam sha, Malaysia mungdan kata
Dum bru dim bra rai di nga, Wunpawng Myusha ni wa
KRC ngu ai mi hpaw da, Wunpawng Myusha ni a matu nga
Li la ai lit hpe shi gun da, Wunpawng Myusha ni hpe lakawn la na
Wunpawng ni lawt lu hkra, n sim n sa Shi shakut ya
A ten a hkying shi n yu, Wunpawng Myusha ni a matu
Wunpawng wa jam jau ai hpe na, lang dat Shi du sa wa
Myu baw sang shi n yu, Wunpawng ni a matu chyu
N kam ai nga di Shi n nga, Wunpawng ni a matu wa
Wunpawng ni lawt lu na lam, Maja let galoi ma Shi tam
Wunpawng ni jahkrit shama, tut e Shi hkrum sha
Sat na nat na nga mung tut, tim hpang de Shi galoi n hting nut
Wunpawng ni a matu nga, yawng a shawng kaw Shi tsap ya
KRC ngwi pyaw nga u ga nga, tut e ngai kyu hpyi ya
Myit mang ai lam yawng awng dang, tut kyu hpyi ya ding yang...

Mut Tsawm

(Matsing;- Laika ka ninghkring Mut Tsawm kaw nna, Ningnaw shiga de ka shagun ya ai ga shagawp hpe madun dat ai.)

2 Lang na ICT Wunkat yu lamang hta Wunpawng sha marai (5) shagrau lakmat hkam la lu

1st-Sept-2010
Naura Shadang

2010 ning a numdaw 2 lang ngu na ICT (Information and communication technology) wunkat yu lamang hta Jinghpaw Wunpawng Tsinyam Jawngma marai (5) shagrau lakmat hkap la lu sai re.

Ndai lamang hpe Kuala Lumpur, Chinese Asembly Hall hta ninghtoi 30-July-2010 ya manap 10:00am hta galaw lai wa sai re.

Shagrau lakmat jaw ai hta Pass, Credit, Distinction, ngu nna masat da ai hta KRC jawngma marai (5) hte gaw Credit hte awng hpe chye lu ai.
No.2 lang na wunkat yu lamang hta ningtawn katsi lu mat wa ai jawngma yan gaw;- (1) Van Nun Cung (9 ning), Cherus Baru Chin Laerning Centre, (2) Thawng Za Uk (19 ning), (ACR) yan rai nga ai.

Uhpung hku nna ningtawn dik htum kumhpa hpe gaw Distinction law malawng hte jawngma marai (19) shagrau lakmat hkam la lu ai MKO (Karen) ni lu mat wa sai re.

Wunkat yu jawngma yawng gaw, tsinyam hpung yawng kaw na jawngma marai (95) rai nga ai.

No. (1) lang na ICT wunkat yu lamang hpe gaw lai wa sai 1st-April-2010 hta galaw mat wa sai hpe chye lu ai.
Ya na zawn tsinyam ni hpe Computer hpaji sharin hkaja lu hkra ahkaw ahkang lajang ya ai gaw Mungkan Wunpawng Tsinyam Rung (UNHCR) rai nga ai.

Tsinyam masha ni jak bawnu hpaji chye chyang kung kyang wa na matu yaw shada let, UNHCR a SPF (Social Protection Fund), Hartford Academy hte Tsinyam hpung ni rau ta gindun galaw ai lam rai nga ai.

Wunkat sharin hkaja ai ladat gaw, tinang a tsinyam hpung hta tinang a chyauman sara ni hte sharin hkap la nhtawm, san poi hpe gaw Hartford Academy hta sa htai ra ai hpe chye lu ai.

Wunkat lung ai hta asak pang garan da ai lam n nga ai hta n'ga, hka ja mayu ai ni yawng dep hkap lu hkra aten hpe mung bawng ban jahkrum la mai ai hpe chye lu ai.

KRC jawngma ni hpe shagrau lakmat lu la hkra sharin achyin ya ai gaw KRC hta apnawng wa sai Sara Tsunhpawng Ja La rai nga ai.
Matut nna computer hpaji myit lawm ai Wunpawng sha ni nga ai rai yang KRC Rung de sa du nna tinang sharin mayu ai aten ni hpe sa du bawng ban mai ai lam hpe mung chye lu ai.

Tsinyam Hkrun lam

Tsinyam Hkrun lam

Tsinyam Brang
1st-August-2010 (Monday)

Mungkan Wunpawng Tsinyam Hpung gaw tsinyam masha yawng hpe garum madi shadaw nga ai lam hpe 1951 ning kawn hpang wa ai rai nga ai. Dai ni na ten, mungkan hta tsinyam masha wan 43.3 (million) du nga sai.

Mungkan Wunpawng Tsinyam Hpung kawn garum ai lam hta Amyu, Makam masham, Mung masa hpung, shinggyim ahkaw ahkang ni a majaw zingri zingrat hkrum nna jamjau ai masha hpe garum ai lam rai nga ai. Tinang a mungdan kaw n mai nga ai majaw maigan mungdan de du nna shinglam hpyi shawn ai ni rai nga ai.
Mungkan Wunpawng Tsinyam Hpung hku na tsinyam ni hpe garum ai hta lam masum nga ma ai.

1. Proctection - Tsinyam ni hpe du nga ai mungdan hta shinglam lu hkra makawp maga garum ya ai lam
2. Resttlement – Nambat masum mungdan de htawt sit sa ya ai lam
3. Repatriation – Madu mungdan de bai n htang sa ya ai lam ni rai nga ai.

Malaysia mungdan hta Mungkan Wunpawng Tsinyam Hpung kawn tsinyam masat hkap la da ai mying jahpan (Registration) gaw 90,000 (mun jahku) du nga sai re. Malaysia mungdan hta tsinyam ni hpe mungdan htawt sit ai lam gaw laning mi hta tsalam shadang 10% sha rai yang gaw ya na aten Tsinyam ni yawng hpe Mungdan htawt sit ya na nga yang gaw 9 ning daram na na masa nga ai.

Malaysia mungdan hta lai wa sai 1975-1996 ning lapran e Vietnamese tsinyam 9,000 hpe shan the a mungdan de (Repatriation) bai n htang sa ai lam nga lai wa sai hte maren Myen mungdan mung masa ngwi pyaw simsa jang Myenmung masha tsinyam ni hpe mung, madu mungdan de bai n htang sa mai nga ai lam hpe mu mada ai.

Dai majaw Mungkan Wunpawng Tsinyam Hpung kawn tsinyam masha hku nna masat hkam la da ai langai hkrai gaw tsinyam rung a woi awn ai n-pu hta e hkawmsa nga ra ai hte maren Mungdan htawt sit sa ai lam (Resettlement) hta Mungkan Wunpawng Tsinyam Rung kawn lajang ya ai mai byin ai mungdan (available country), tinang ang ai mungdan, shaga la hkrum ai mungdan de sa ga ngu Jinghpaw Wunpawng tsinyam ni yawng hpe saw lajin dat nngai law...

Tsinyam Brang

UNHCR League Cup Uhpung Ninggam hta KRC gawdin hpung ni Mus Aid gawdin hpung hpe 3-1 hte dang

UNHCR League Cup Uhpung Ninggam hta KRC gawdin hpung ni Mus Aid gawdin hpung hpe 3-1 hte dang

Naura Shadang
28-July-2010

2010 ning a Malaysia-UNHCR League Cup, uhpung ninggam (Group Stage) hpe Cheras Maluri, Taman Pudu Ulu gawdin ginsup pa hta July (24) ya shani kaw nna ginsup hpang wa sai re.

Ndai gawdin ninggang shingjawng poi lamang hta Malaysia mungdan hta nga ai tsinyam hpung 16 kaw na gawdin hpung ni yawng hkum hkum ra ra shanglawm ai hte Hpung A,B,C,D garan nhtawm hpung mi hta gawdin hpung 4 hpra shingjawng gasup ai rai nga ai.

Jinghpaw Wunpawng Tsinyam Hpung (KRC) a gawdin hpung gaw Hpung D hta lawm ai rai nna, 25-July-2010 ya shani, shawng ningnan lang na uhpung ninggam ginsup poi hta Muslim Aid gawdin hpung ni hpe 3-1 hte dang mat nna amat 3 hpe lu la tawn sai re.

Ndai gawdin ginsup lamang hpe UNHCR a bungli dap langai rai nga Socail Protection Fund (SPF) lamang kaw nna woi awn galaw ai rai nna, Malaysia mungdan hta nga ai tsinyam hpung ni shada grau nna hkau chyap wa lu na matu yaw shada ai re lam hpe chye lu ai.

Woi awn galaw ai SPF kaw nna, gawdin hpung shagu hpe hkawm sa hkawm wa a matu uhpung ninggam (Group stage) hta RM-200 hpra garum jaw ai rai nna, Quater Final madang du wa ai gawdin hpung ni hpe gaw RM-200 hpra bai kahtap garum na re hpe mung chye lu ai.

Muslim Aid gawdin hpung hpe 3-1 hte abrep lu ai KRC gawdin hpung a woi awn sara (Coach) gaw KRC ningbaw Sara Labang Naw Seng rai nna, gawdin hpung ningbaw (Captain) gaw Sara Ah San Shihkun re hpe chye lu ai.

KRC gawdin hpung a woi awn sara (Coach) Sara Labang Naw Seng gaw, "Group stage hpe sha gaw loi loi hte lai lu hkra shakut nna, Final hta ninggang madu lu hkra shakut na re" nga nna dagrang da nga ai re.

Uhpung ninggam a no.2 lang ngu na ginsup poi lamang hpe ninghtoi August (8) ya manap hkying 8:00 am aten hta galaw na re hpe mung chye lu ai.

Jinghpaw Wunpawng Tsinyam hpung shang masha ni mung sa du n-gun jaw na matu KRC gawdin hpung ni hpyi lajin nga ma ai re.

KRC gawdin hpung shanglawm ai uhpung ninggam ginsup poi aten chyarang

KRC Vs Mus Aid 25-July-2010 10:00 am 3-1
KRC Vs Somali-II 08-August-2010 08:00 am
KRC Vs OKD (Karenni) 28-August-2010 08:00 am

Shara;- Cheras Maluri, Taman Pudu Ulu Gawdin Pa

Shang lawm ai gawdin hpung ni gaw;-

Group A;-
(1) Afgan-I
(2) BMC
(3) ARRC Puchong C3 (Rahkaing)
(4) UNHCR Interpreters

Group B;-
(1) ZAM (Zomi)
(2) Afgan-II
(3) ACR CRC C1 (Hkang)
(4) Mas Karen Org C5

Group C;-
(1) SRO C7
(2) ARRC KL C2 (Rahkaing)
(3) Somali-I
(4) MyaMu/Roh1 Musaid

Group D;-
(1) Mus Adi
(2) OKD C5
(3) KRC C4
(4) Somali II

Tsinyam ni a No.3 Mungdan lata ai aput angun nsen a majaw Tsinyam Rung na Salang pawt

Tsinyam ni a No.3 Mungdan lata ai aput angun nsen a majaw Tsinyam Rung na Salang pawt

Naura shadang
22-July-2010 (Thursday)

Malaysia mungdan kaw sa du machyu nna no.3 mungdan de shingbyi ahkang shawk nga ai Jinghpaw Wunpawng tsinyam ni gaw, htawt sit shara jahkrat san/htai madang (resettlement interview) hta mungdan lata ai majaw, Malasyia UNHCR rung kaw na (Resettlement Officer) kaba wa grai pawt ai lam tsinyam rung shiga lawk kaw nna chye lu ai.

Malaysia-UNHCR gaw Lai wa sai 2009 ning ka-ang hkup daram kaw na 2010 ning ka-ang hkup du hkra Malaysia mungdan hta sa du nga ai myen mung na myu baw sang tsinyam ni hpe tsinyam masat hkap la da ai jahpan gaw mun jahku jan rai sai re. Ndai hta Jinghpaw Wunpawng tsinyam ni mung 3000 jan tsinyam masat hkrum sai re.

Ya, 2010 ning July shata kaw nna gaw, lai wa sai shaning hta tsinyam masat hkap la da ai tsinyam nkau mi hpe No.3 mungdan hta htawt sit shara jahkrat ya lu na matu, (Resettlement Interview) hpe shaga wa magang sai re.

San htai a matu shaga wa hkrum ai ni hta na, Europe dan a mungdan malawm langai rai nga ai Romania mungdan de ang ai ni gaw n kam sa ai lam aput angun tsun ai majaw (Resettlement) kaw na Officer kaba wa gaw grai pawt nga ai re hpe chye lu ai.

Grau nna dai ni na nhtoi hta UNHCR rung de san htai a matu, matut mahkai da hkrum ai Jinghpaw Wunpawng tsinyam ni kaw na marai 10 gaw tinang a phone pat ai gaw pat, phone shaga nsen na tim n htai rai nna, matut mahkai dawm ai hte tsep kawp n sa du ai majaw na chying wa pawt nga ai lam chye lu ai.

Ndai zawn Resettlement Interview (RST) ngu ai madang hta mungdan lata taw ai ni gaw No.3 mungdan langai ngai de bai sa lu na matu aten shata 18 bai kahtap la ra na lam chye lu ai. Kaja wa gaw shata 18 n-ga ai sha, 2,3 ning du hkra pyi aten shajan la ra wa na re lam hte shanhte a laika nhtan (File) ni mung yawng a hpang jahtum de she bai du mat wa na re lam, tsinyam rung shiga lawk hku nna chye lu ai.

Ya na zawn tsinyam ni le ra, aw ra mungdan she sa mayu ai nga nna mungdan lata chyai ai rai yang amyu wunpawng sha tsinyam ni yawng a matu sum machyi wa ai lam ni byin wa lu na re lam hpe mying n kam tsun ai tsinyam rung mu gun langai kaw nna Ningnaw shiga dap de sadi jaw wa sai.

"Tsinyam ngu ai ni gaw tinang mungdan de wa na matu mung asak shimlam hkrit ra sai. Dai majaw UNHCR kaw na matsan dum ai myit hte sa ya ai mungdan de mungdan n lata ai sha sa ai gaw kaja dik re. Malaysia mungdan hta sha nga nga yang mung prat shawng lam a matu shim lam n nga ai. N myit mada ai sha asak si hkrum wa na rai yang, lup wa pyi n lu ai shara re majaw tinang hpe mungchying sha hku masat la lu na kaning re ai mungdan de raitim sa ai gaw kaja dik re" nga nna, lahta na tsinyam mu gun wa hpaji jaw wa sai.

Ya na zawn Jinghpaw Wunpawng tsinyam n kau mi Romania mungdan de n kam sa ai lam gaw lai wa sai 2010 ning June shata praw de Romania mungdan de htawt sit mat wa sai Jinghpaw Wunpawng tsinyam marai 38 gaw dai mungdan hta yak hkak jam jau nga ai lam shiga a majaw madung rai na hpe sawn maram lu nga ai.

Romania mungdan gaw tsinyam masha ni hpe hkap la ai lam hta shawng ningnan lang re majaw shanhte hta ningra ai lam ni gaw loi li nga na chyalu re. Rai timung du sa wa ai anhte Jinghpaw Wunpawng tsinyam ni gaw tinang tsinyam ni lu ging lu ang ai ahkaw ahkang ni hpe si mani ai hte zai ladat hku nna hpyi la ra na lam hpe London hta nga ai KNO kaw na Slg. Hkun Htoi mung, Romania mungdan du nga sai W.P tsinyam ni hpe tsun hpaji jaw wa sai re.

Kuala Lumpur hta nga ai Slg. Daulung Zau Awng mung, "Tsinyam ni a matu Malaysia na lawt na sha ahkyak dik re. Romania mungdan nga tim EU munghpawm hta lawm ai majaw myit mada shara grai nga nga ai. Dai mungdan hta du ai hpang 4,5 ning shakut nna matut n kam nga jang kaga EU mungdan hkan htawt sit mai ai. Madung gaw shinggyim ahkaw ahkang hpring hpring hte nga lu na she ahkyak madung re" nga nna shi a ningmu hpe tsun ai.

Matut nna Jinghpaw Wunpawng tsinyam ni a shawng lam ahkaw ahkang n pat mat na matu gaw UNHCR kaw na matsan dum ai myit hte tam ya nga ai no.3 mungdan ni de aput angun n nga ai sha htawt sit na matu gaw ahkyak dik re ai lam tsinyam rung hta na mu gun wa aja awa hpaji jaw wa sai re.

Malaysia Mungdan de Ja Gumhpraw tam na nga sa mat wa ai Manang wa Naw Naw hpang de Buga na manang wa a shagun laika.

NINGNAW, 5-July-2010

De;

Tsawra ai Manang wa Naw Naw,

Myit dum la let n dai laika hpe kadat lu n ngai.
Tsaw ra ai Manang wa Naw Naw ngwi pyaw hkam kaja ai hte seng ang ai magma bungli ni hpe galaw shakut nga na re hpe kam ai.

Manang wa Naw Naw e, Manang wa hpe tsun mayu ai lam gaw, Manang wa nang Na a tsawra ai Nu yan Wa hte Kahpu Kanau kana ni, Jinghku jingyu ni hte Manaw manang ni, daidaw Buga hte Wunpawng Mungdan hpe kau da nna, yaw shada lam kaba hte Malaysia Mungdan de ja gumhpraw tam na nga nna pruhkawm mat wa ai dai ni (7) ning hpring nna (8) ning de pi rai mat wa sai le.

Tsaw ra ai Manang wa, Nang Malaysia de rai n sa shi yang Ngai hte Na a tsawra ai manaw manang ni hpe Nang byin mayu ai lam, Nang galaw mayu ai lam (Na a yaw shada ai lam ni) hpe tsun hpaw dan dan rai ai le.

Nang tsun ai ga ni hpe dai ni du hkra nye a myit kraw hta mani mana sha Nang tsun ai zawn nga matsing taw nga ai, rawng taw nga ai. Nang tsun tsun re ai Malaysia sa nna, ja gumhpraw tam na, gumhpraw law law lu jang Nu yan Wa hpe ngwi ngwi pyaw pyaw hte tawn da na, Kanau ni hpe hpaji janmau lu hkra jawng da na, Nawku hpung hpe pawn ba na, matsan mayen n lu n lawm ai ni hpe garum shingtau na, Ramma ni a rawt jat galu kaba lam hta shanglawm madi shadaw na,. na,...na,... na,... Na a tsun shaga ai lam ni hpe anhte manaw manang ni grai n-gun lu lai wa sai, Na a myit jasat hpe Jinghku jingyu ni yawng shakawn lai wa sai.

Manang wa Naw Naw e, dai ni na n'htoi hta Wunpawng Mungdan a mung masa lam ni n kaja, hpaga yumga lam ni hkrat sum wa, tam lu tam sha na lam ni yak hkak wa, galaw lu galaw sha na lam ni moi na zawn n mai mat sai. Manang wa a daidaw buga rai nga ai ahhte a Kahtawng mung ndai zawn re ai mayak mahkak ni hpe hkrum katut taw nga sai le. Du hkra ladaw ni galai shai mat ma sai. Ana ahkya ni mung lani hte lani grau grau she law wa nga sai.

Tsawra ai manang wa Naw Naw, Na a tsawra ai chyinghkai Nu yan Wa hte dum nta masha ni mung anhte Mare masha ni hte maren sha ndai zawn re ai mayak mahkak ni hte hkrum katut nga ai re. Ndai lam ni hpe manang wa Naw Naw gaw chye nga ai kun...? Na a Nu yan Wa, Kahpu Kanau, dum nta masha ni hte anhte manaw manang ni ni hpe matut mahkai n galaw ai
shaning law law rai mat wa sai.

Ya ten hta manang wa Nang ja gumhpraw ni grai lu mahkawn sai kun...? Na a Nu yan Wa hte Kahpu Kanau ni, Buga hte Nawku hpung, nlu n lawm ai ni hte Ramma ni hpe Nang garum na jin jin rai sai kun...? Wunpawng Buga de wa nna Na a dai dai daw Buga hpe rawt jat galu kaba wa hkra pawn ba la na aten rai n du shi ai kun...? Na a Kanau ni hpe hpaji jan mau lu gup hkra shakut ya na aten n rai shi ai kun...?

Manang wa e Na a Kanu Kawa hte Kahpu Kanau dum nta masha ni, Nang tsawra ai Buga na manaw manang ni, jinghku jingyu ni hte Buga masha ni yawng gaw nang hpe myit mada ala nga ma ai le. Tsaw ra ai manang wa a yaw shada ai pandung de rai n du shi ai majaw dum nta hte Buga de matut mahkai n galaw ai kun...? Manang wa kaw mayak mahkak lam ni nga ai majaw matut mahkai n galaw ai rai kun...?

Tsaw ra ai manang wa Naw Naw e, hpa mi rai rai le Na a Nu yan Wa hte dum nta masha ni hpang de sha gaw matut mahkai galaw u yaw. Na a Nu yan Wa hte dum nta masha ni Na a shiga n na ai na mat ai majaw myit tsang nga ma ai. Anhte Buga na manang ni mung Na a lam hpe na chye mayu ga ai.

N dai laika lu la hti ai hte Manang wa kaw na bai matut mahkai wa na hpe kam ai.
Tsaw ra ai manang wa Naw Naw myit mang galaw sa wa ai lam ni yawng awng dang ai lam lu la u ga akyu hpyi garum ya let,

Na a tsaw ra hku hkau dik ai manang wa,

Mut Tsawm
Wunpawng Buga

Malaysia kaw Masha rim shagyeng woi la ai hpung (Kidnap Gang) hpe rim lu

Malaysia kaw Masha rim shagyeng woi la ai hpung (Kidnap Gang) hpe rim lu

Naura shadang
NINGNAW, 1-July-2010

Malaysia mungdan hta Myen mung tsinyam amyu shayi langai hpe sun bungli galaw ai Myen amyu masha langai hte shi a manang ni rim shagyeng woi la mat ai majaw Malaysia Riggit 28000 (Mun lahkawng hkying matsat) hte bai shaw la ra ai lam dai ni June shata praw 1 a Star shi laika hta lawm wa ai re.

Asak 20 ning grup yin rai nna UN tsinyam lakmat lang da ai ndai numsha hpe lai wa sai June shata praw (8) ya hta Kuala Lumpur mare shinggan Kepong lawk kaw na shi bungli galaw ai shat seng de sa wa ai lam kaw na rim shagyeng woi mat ai re lam chye lu ai.

Lu sha seng hta garum ningtum amu galaw ai ndai numsha gaw shi hpe rim woi da ai ten hkum shan roi rip hkrum ai lam hpe mung shi laika hta ka madun da ai re.

Kuala Lumpur Mare daju, sawk sagawn jep chyoi dap a tau dap up rai nga ai Datuk Ku Chin Wah gaw Rim shagyeng woi la ai hpung ni gaw shawng ningnan e Riggit sen mi hpyi ma ai re, raitim hpang e 28000.00 hte manu dara la lu ai re lam tsun dan ai.

June shata (9) ya shani gumhpraw jaw ngut ai hpang, n tsen na zawn re ai masha marai (5) hpe mu ai majaw balik ni wang rim ai kaw UN tsinyam lakmat lang tawn ai myen mung masha la (3), num (1) hte mungdan masha (1) yawng marai (5) hpe lu rim tawn ai lam shi matut tsun ai.

Rim shagyeng woi la hkrum ai numsha a manang kaw nna, June 9 ya, shana hkying 9 ten hta Kotaraya kaw na Madalay lu sha seng hta gumhpraw sa jaw ai shaloi gumhpraw hkap la ai asak 30 grup yin re ai sun amu galaw ai myen mung masha Aye Min Win hpe gumhpraw hkap la ai mara amu hte lai wa sai shani kaw nna tara rung hta tara dara hpang wa sai re.

Ndai mara amu hta shanglawm ai kaga malawm ni a hpaw tsun ai hte maren madung woi awn ai Aye Min Win hpe seng ang ai tara rung hta tara dara lu ai hte jaw kau ai gumhpraw hpe mung balik ni bai lu la ai lam chye lu ai.

Tara Agyi Siti Shakirah Mohtarudin gaw tara hkam Aye Min Win hte malawm Malay mungchying sha marai (2) hpe Riggit 10000.00 ama hkam hte dat dat nna du wa na July 23 ya hta, ndai mara amu hpe matut jep chyoi na matu nhtoi masat dat sai lam shiga hta madun da ai.

Mara dan dawng ai raiyang tara hkam ni gaw 10 ning hta n jan ai htawng ari (shnr) ri dam hkrum na re hpe chye lu ai.

Mying n kam tsun ai myen mung masha langai gaw, "Shanhte a ningbaw mying gaw Soe Lay nga ai re. Ndai ni yawng tsi ya ni rai ma ai. Htawng de pru dat shang dat rai nga taw ai ni re. Shanhte a udat shara gaw Myen seng makau grupyin hkan rai sai. Grai sawng ai ni rai ma ai. Shanhte kata kaw mung balik ni da sang dat bang da ai ni
lawm ai re. Ngai shadu yang ngam ai myen mung masha (3) gaw bai lawt na re" nga nna tsun wa ai.

Mung masa sumtsaw II

Mung Masa Sumtsaw II

Pan Tap
(11:40 PM, 23rd May,2010)
KIWA, Laiza Muklum

Matsing: :Maigan e nga ai Mung masa sumtsaw wa hte Laiza e nga ai Mung masha sumtsaw jan yan a, Nbung hprinawn shiga htinglet San, Htai ga shagawp II.

Tsaw e,
Mung masa majaw kun? Hpa majaw kun?
Nye kanau ni myit n su,
Myen ga chyu ga ma sai lu!
Kade tsun tim n chye na,
Na htat dik mat sai masha;
Kaning ngu na tsun lajin,
Myit pu nna ngai chyu kyin;
Lama mi she rai ang sai,
Myen ni hpe n tsen n ngai;
Hpaji naw jaw la rit Tsaw,
Bawnu nchyan naw shaw jaw – rai u le yaw.

Tsaw e,
Hka hta marang jat nga ai hpa,
Myen ga chyu shaga ai n kaja;
Dum nga ninglen hka yawng ai,
Daini anhte nan rai sai;
K’nau myit n su ai hkum tsun,
K’nu K’wa ni nan n dinglun;
N jaw ai hpe n sharai,
Shanhte nan mung n lak lai;
Mat ma wa sai tinang ga,
Lu ntsin hpe mung ahka nga;
Ntsin nga jang n chye na,
Hpa re kun? nga, mau mahka;
Tsaw nang zawn sha myit ru ai,
Htawm na m’tu tsang la nngai.

Tsaw e,
Dai zawn byin hkra yaw shada,
Ntsa na policy n re hka?
Myen ga ga mat sai masha,
Myen jahpan hta shang sai hpa;
Kachin ngu jahpan n bang,
Myen tai ma sai ngu sawn lang;
Maroi nni dik nngai,
Lau tsun dan rit Tsaw shingtai.

Tsaw e,
Tsaw nang tsun ai jaw dik sai,
Mung m’sa myit m’gaw ngu re ai;
Ntsa na policy nan she rai,
Shanhte bawnu grai laklai;
Myen mung ting na bum nga masha,
Yawng yawng Myen ga ga mat hkra;
Ntsa na dai policy jahkrat,
Sai gayau kau na she masat;
Dai lam anhte chye da ra,
Policy hta n k’dawng bang hkra –
grai she tsun shaja ga lu oi.

Tsaw e,
Ya, langai naw san mayu,
Myen mung ting matsan hkra chyu;
Lam shagu hta shagrit da,
Mung masha ni hpa n sha;
Sut n su magang shi K’bu,
Kawsi shagu tsun garu;
Mungkan ting jawm hpu magang,
Na n na ai zawn nga chyalang;
Ndai mung policy n rai i?
Tsaw nang tsun dan ga nit ni?

Tsaw e,
Tsaw tsun sai le – Tsaw jan e,
Mungdan ting matsan mat hkra,
Policy jahkrat ai lam ni nga;
Maga mi de sai gayau,
Maga mi de m’tsan chyinglau,
Dai Policy awng dang hkra,
Shani shana shakut nga;
Ya, m’tsan ai lam awng dang sa,
Sai gayau ai hta loi naw chya;
Shadum hkat na ten naw nga,
Sharai lu na tsun jahta;
Matsan mi matsan mat tim,
Sai prut ai gaw n mai zim;
Karai hpan da ai Amyu,
L’ngai pyi n mai yet ai lu!

Ataw! Tsaw e,
hpa rai me dai policy,
Shanhte wa ra sharawng si;
Hpabaw yaw shada ai lam rai?
Mung masha ni na gashai,
Nde n kaja ai amu,
Shanhte rai nna she saku;
Mung masha ni chye na hkra,
Sanglang lu na Tsaw chyu sha.

Tsaw e,
Myen mung yawng ting myen tai mat,
Matsan ai mung chyat hkrai chyat;
Hpaji lam mung Ziru de,
Ngaw ngaw re ai hkrai gale;
Shingrai policy awng dang jang,
Shanhte hkrai up na ngang kang;
Prat tup laba ka-up na,
Hkawhkam tai na yaw shada;
Shingre ai shi masin myit,
Mung masha hpe chyu nying jahkrit;
Daini anhte zen ra sai,
Tinang l’ngai hkrai sadi ra ai – ngu,
Myu hpe tsawra ai myit the,
Myit m’lai sh’jang na lam de she –
woi shadu woi sa ga lu oi.

Ga hpung dim : : Chyeju kaba sai yaw Tsaw,
San m’yu ai lam grai naw law;
Htawm na matu naw ngam da,
Nbung hprinawn htinglet la;
Tsan gang timung ani zawn,
Galoi raitim san sagawn;
Tsaw nang sha singga na lu!
Marit dik ga ai re lu!
Tut nawng e hpaji naw jaw,
Grin ngang ai mung masa sumtsaw;
Yup tung pyi she tung wa sai,
Yup sanu yaw Tsaw – bye bye.

P.S;- Ndai Mung masa sumtsaw II ngu ai ga shagawp hpe ka ai ya ai Saranum gaw Jinghpaw Mungkan hta mying gumhkawng ai Sumrai ka ninghkring kaba rai nga ai. Ya ten na masa hta hkan nna shi a mying majing hpe n lu ka madun ga ai re. Editor

Nye Nu Rai Taw

9-5-2010, Kanu Masat Nhtoi Ga shagawp

NYE NU RAI TAW!!!

Mani sum sai... n chye pawt ai
Sari rawng ai... gajai n mai,
Makam hpring hpring... yawng hpe sharing
Htam shi n hprai... alu jaw ai,
Shawang myit rawng... amying gumhkawng
Hpaji hkum hkum... myit mung sum nung,
Amyu hpe tsaw... jinghku shalaw
Yawng hpe Shi daw... Nye Nu rai taw!!!

Chyum laika hti... akyu Shi hpyi
Chyeju mahkra... Shi hta hpring nga
Larau Ladau... hkalum hkap tau
Hpung hta myit kap... htunghking hta tsap
Kahpu kanau... karum shingtau
Mayu, Dama... shingdu n kau,
Tsawra hkri dun... ngwi pyaw shangun
San seng myit hpraw... Nye Nu rai taw!!!

Kanu kaja... rap rap ra ra
Ngwi ngawn pyaw hkra... yawng hte jahta,
Teng man lam tsaw... shut ai lam taw
Tsawra myit law... shi hpe yawng tsaw
Pandung n yit... anut tik tik
Dinghku hpe sin... sutgan jahpring,
Shawng lam de myit... lahkam htawt sit
Myit sawn ai tsaw... Nye Nu rai taw!!!

Brang Lang

Tsawra ai Malaysia na manang wa hpang de

De,

Tsawra ai manang wa hpang de, Wunpawng buga shara mi kaw nna myit shingran let, n dai laika hte shakram dat n ngai.

Manang wa e, nang chyawm gaw sumtsan Maigan du, bungli kaja lu. Shingnip kata dung computer sha jum rai nga na hpe kam ai. Nang du nga ai Malaysia Mungdan hpe masha ni tsun jahta ai hpe sha na yu nna n du ga tim anhte Mungdan hta lam shagu rawtjat galu kaba ai Mungdan rai na hpe myit shingran mu n ngai. Dai majaw Wunpawng buga na Ramma ni hkying hku nna sadu nga ai lam hpe mung na lu ai. dai lam ni gaw kaja teng na re i? hpa majaw nga yang Wunpawng buga ginra hta lam shagu yak hkak, dinghku kata na mayak, tinang a shawnglam mayak hpe lawt lam tam let pru mai ai chyinghka hku nna matsut je pru wa ai hkrai rai na hpe kam ai. Gara masa lam hku nna pru pru, du du n sin kata na pru nna Mungkan hpe loi sha gaw mu lu ai ni rai na sai kam ai.

Anhte Mungdan, anhte buga hte gaw lam shagu, wa shakap shai rai na re ngu shadu ai. James Bond sumla hkrung langai mi kaw Malaysia Kuala Lumpur na Twin Tower hpe mu dat n ngai. Grai hkik hkam ai (wa hpang) tower kaba re hpe mu lu n ngai. Ngai mung masha n lu du tim myit shingran hku nna gaw Mungkan hpe shinggrup taw nga n ngai. Galoi she du lu na kun nchye ai.

Manang wa hte Malaysia du Wunpawng Ramma n kau mi gaw mungkan jut shara shagu de du lu ai gaw Karai Kasang lajang ai lam re yaw. Anhte Wunpawng buga gaw lam shagu shaman chyeju hpring ai lamu ga re. Raitim anhte hpa rai matsan mayan rai nga ai kun? Madung gaw hpaji n chye ai majaw rai kun? Anhte a jinghpaw ga malai langai mi nga ai “n lu ai hta n chye ai gaw yak htum” re da. Dai ni Nye hkum ngai nan dai hku sha myit lu ai. n chye ai majaw chyelu, mu lu na matu, daini anhte sharin la lu na matu nanhte manaw manang ni gaw Wunpawng yawng a gawng malai re ai yaw.

Nga len, nga nan, nga pyaw mat ai ni n rai u ga yaw. Malaysia kaw na kaga mungdan de resettlement program hte du hkawm mat wa na Wunpawng Ramma manang wa e lani mi na n-htoi hta anhte a mungdan anhte a buga hpe anhte lata hte anhte nan gaw gap la ra na re ngu ai hpe dum u yaw.

Anhte amyu sha ni gaw Manau nau ai ni re majaw Nau Shawng wa hpe sha yu chye ai. Dai ni na mungkan gaw Rap ra ai mungkan she rai mat sai. Yawng gaw Rap Rap Ra Ra rai ka ra ai prat rai mat sai hpe dum shajang ga yaw.
Tsun mayu ai gaw Ningbaw ngu ai ni hpe hkrai n yu ai sha, tinang nan mung Ningbaw hku nna hkam la let bungli lam shagu hta lit la chye ra saga ai lam hpe tsun mayu ai .

Manang wa hte Wunpawng Ramma ni yawng lani mi hta Wunpawng Buga de bai du wa na a ten kaw Wunpawng Mungdan hte Amyu sha yawng a matu hpaji langai hpra la wa nna naw kaji kadun nga ai anhte Wunpawng Amyu ni hpe lam woi ningshawng tai lu hkra grai shakut ga yaw. Grai mung kam kaba taw nga n ngai.

Tsun jahta mayu ai lam ni gaw grai naw law la ai re wa, raitim anhte mare buga gaw nang chye ai hte maren mihprap wan n nga ai majaw Wan shadaw sha lu lang ai. Dai ni tup yi kaw mam ting nna grai ba la ai. Yi hkan mung kanu kawa sak kung ni she law la ai yaw. Yi ngam kaw tsap lu na Ramma ni law malawng wa Ka-ni lu sha chye ai ni hkrai she rai ma sai oi. N dai lam gaw yawn hpa shi ga re, n kam tsun tim gara hku shading sharai na ngu ai hpe manang wa chye lu na matu tsun dan ai lam re.

Manang wa e…… Wan shadaw mung htum wa sai. Hpawt de jau jau yi de mam ting bai sa ra ai majaw nye lai ka hpe n dai kaw naw da sai yaw. Tsaw ra ai manang wa hte Wunpawng sha ni yawng Awng dang ai hkrun lam hta tsap lu mu ga.

Manang,
Bum Sinwa
Shagawng bumga, Wunpawng Mungdan

Man chyang Zi Num shi htawn dan na

Manchyang Zi Num
22-May-2010

Hpu Ba na wa ai gaw n re yaw...

Man Chyang Zi Num nan mu hkrup, hti hkrup ai hpe shi htaw dan na she re. Na ga ai n rai? Jinghpaw Wunpawng myu sha ni Mahtum Mahta GA de laika sa hpyi la yang, Lam jarik htum mat na Shan Hpyi Laika ju sha kau ai lam le. Shan Hpyi Laika ju sha la ai majaw Jinghpaw Wunpawng myu sha ni IQ/EQ hpring hpring rai mat sam ai da le.

Bawnu grai kaja ma ai majaw laika n lu tim, Jinghpaw Labau hpe pyi by heart tsun lu ai da yaw. Jai Wa Ga, Dum Sa Ga, Kai Ji, Ga shagawp, Ga Malai, Maumwi ni mahkra hpe Dum Lawng hta Dum Hkang hti ai zawn n-gup hte sha tsun wa ma ai re yaw! N mau i?

1895 shaning hta chyawm gaw n mai ju sha ai baw laika hpe Dr. Ola Hanson shapraw dat ya sai oi! Shawng nnan na Jinghpaw laika buk gaw Dr. Ola Hanson ka ai Jinghpaw -English Dictionary re ai yaw. Matsing da ga lu. 1927 ning March shata 27 ya shani Manmaw kaw galaw ai Jinghpaw ni kaw Sasana shang ai (50) ning hpring Ja Jubilee hta gaw Jinghpaw hku gale da ai Chyum laika hpe Dr. Ola Hanson nan ap ya sai re.

Dai hpang kaw na matut manoi pru wa ai Laika Buk, Journal, Magazine ni gaw naw dum ai i? Malap sai n rai? Bai shi htaw dan sai lu oi! Jinghpaw Hkalup Hpung kaw na shapraw ai 'Jinghpaw Shi laika' hpe August 1914 kawn 1942 lapran shata mi kalang lu shapraw sai re. Hpung hte seng ai raitim, Sumrai, Sumroi, Shiga kadun ni hpe shalawm da ai da yaw. Moi kaw na prat dep chyalu... i!

Myen mung shanglawt lu ai hpang, 'Jinghpaw Mung Gintawng' shi laika hpe mung Jinghpaw mungdaw Shi Sumla Dap (Pyan Chyar Ye Hta Na) kaw na bat shagu shapraw yu sai yaw. Taw Lan Ye Kongsi prat hta gaw 'Mali Gindai' gabaw hte 10 ya hta kalang bai shapraw ma ai da. 1947 ning hta mung 'Pawng Yawng Ram Rawt N-sen' nga nna shata shagu shapraw ma ai le.

Mying kaba dik gaw 'Jinghpaw Prat' shi laika rai nga ai. 1958 June shata kawn 1963 February shata du hkra bat mi kalang shapraw ai re. Laika man 12 rawng nna kanan (copy) - 4000 shapraw ma ai. Manu gaw hti mi jaw ra ai da. Du wa Lahpai Zau Bawm lit la shapraw ai hpe myit dum ga i!

Dai ten na Jinghpaw jawngma ni mung n shayawm ma ai. 'Jawngma Journal' ngu ai hpe 1954 January kawn 1955 January du hkra 4 lang shapraw masai re. Dai hpang 1958 ning hta 'Jawngma Ning Li' hte 1960 hta 'Jawngma Shanan' journal ni hpe mung shapraw masai rai.

Manmaw bu ni shan hpyi laika ju sha yang grau sha sam ma ai. Laika grau lu shapru ma ai. 1956 August shata hta 'Shanglawt Nsen' journal, 1957 ning November shata hta mung 'Mung Masha' magazine, 1957 ning 'Ulat Hpunggam' magazine ni hpe ka shalat dat masai re. Jinghpaw Catholic Sasana Hpung ni mung 1957 ning hta 'Jinghpaw Kasa' magazine hpe shapraw sai.

Myitkyina bu na ramma ni mung 'Ramma Ginra' magazine hpe 1963 ning hta shapraw da lu sai. Dai hpang gaw, Yangon Dakkasu Laili laika hte Htunghking Hpung kaw na mung 'Hparat Ninghkawng' magazine hpe 1968 kawn 1988 du hkra shaning shagu shapraw ai hpe yawng dep hti la saga ai. Madalay Dakkasu ni a 'Chyurum Shalat' magazine mung 1969 kawn 1988 du hkra, grai shakut let shaning shagu pru wa sai majaw Jinghpaw Wunpawng myu sha ni myi hpaw na na wa saga ai le....i!

Dai ni na ten hta mung, buga shagu, ginra shagu, laika myu hkum, gabaw law law hte yawng hpe myi hpaw na hpaw n-gup hpaw na matu ladat law law hte shapraw nga masai lu. Kashun kashe mari hti na lit gaw anhte yawng hta nga saga ai yaw....

KRC ni a Ningnaw Journal n hti yang, shawng de lahkam htawt na lanyan taw nga na yaw. Break Dance ka ai zawn shara mi kaw sha ka manawt taw nga na lu! Ningnaw Journal hpe hti let Manau nau ai zawn wuhpung hte rau shawng de htawt sit ka manawt wa ga i!

Man chyang Zi Num pyi Shan Hpyi Laika n lu sha tim, dai ni mu hti, mu hkrup la ai hpe n chye n kaw n hkye n baw rai, ndai lang gaw ndai hte shi htaw dat sai lu yaw....

Shamyet shanat;- Khit amin ne Kachin Yin Kye Mu (Maran Bawk La)

Grai gaw agam ai, hpang shaning she yaw

Malaysia kaw num naw hkungran la na

“Solo travel n re sha, yawng pawng nna jahtoi ga!” nga tsun ai Hparat Hkawn @ Ah Mi hte San / Htai

“Solo travel n re sha, yawng pawng nna jahtoi ga!” nga tsun ai Hparat Hkawn @ Ah Mi hte San / Htai

Naura Shadang
NINGNAW, 25-May-2010

Dai ni na ten Wunpawng Ramma ni Mungkan Secular hpaji hpe madang dep ai mungkan a jawng kaba ni hta hpaji hkaja nga ai jahpan gaw grai wa n law shi ai re. Ndai zawn n law la ai kaw na langai rai nga ai, Czech Republic mungdan Prague Mare kaba kaw Internatioanl Economics & Political hpaji hpe hkaja nga ai KBC Amu Madu Kaba Rev. Dr. Hkalam Sam Son a kasha Shayi Hparat Hkawn hpe KRC Ningnaw Jouranal kaw nna email hte san / htai galaw da ai re. Lak lai ai lam langai gaw Czech Republic mungdan gaw lai wa sai 2009 ning, July shata hta Malaysia na Hkang tsinyam 40 jan hpe hkap la da sai re. Matut nna mung Malaysia tsinyam ni hpe hkap la na lam nga ai hpe shiga lawk hku nna, na chye lu ai. Czech mungdan hta shawng du nga sai anhte a kanau kajan gaw gara hku rai nga ai kun? ngu ai hpe NINGNAW shiga dap na Naura Shadang a san / htai da ai lamang hpe hti yu ga!

NINGNAW; Shawng nnan Ah Mi kaw na shachyen shaga ya rit.
Ah Mi; Shaga mying gaw Hparat Hkawn, Htinggaw myin gaw Hkalam, amyu gaw Marip Lama re. Awa, Rev.Hkalam Sam Son hte Anu, Sarama Daw Zung Nyaw hte rau Myitkyina kaw nga kaba wa ai. Annau ni yawng mali nga ai kaw na Kaba htum re.

NN; Ah Mi ya galaw nga ai lam ni hpe loi tsun dan rit!
Ah Mi; Uhm... Ya, Czech Republic mungdan a mare daju Prague kaw laika hpaji sharin hkam la nga ai. Ngai lung ai jawng mying gaw Charles University in Prague re. 1348 ning kaw na hpaw hpang da ai jawng re.

NN; Myen mung gara hpaji madang ngut da sai kun?
Ah Mi; Um…Myen mung asuya kaw na hpaw da ai dakkasu hpe gaw n lung ngut shi ai hku re. Second year (Psychology) sha naw ngut shi ai. Tim, M.I.T e hpaw da ai, B.A.R.S program hpe 2006 ning hta Social Studies Major hte jan mau lu da ai. Myitkyina Dakkasu hta jawng bai wa lung sha ngut na matu myit yaw shada da ai.

NN; Gara hku nna hpaji hkaja na matu Czech mungdan hpe lata ai rai?
Ah Mi; Czech's Ministry of Youth and Sport kaw na developing countries hkan na jawngma ni hpe jaw ai scholarship hte jawng lung na matu hkap la hkrum ai majaw Czech mungdan de du wa ai re. Bai nna, Tinang shawng kaw du taw ai ahkaw ahkang hpe ngang ngang magra akyu jashawn let yaw shada ai de du hkra lahkam na ngu ai myit a majaw re.

NN; Hpa baw subject hpe madung hka ja nga ai kun?
Ah Mi; International Economics and Political Studies re.

NN; Wunpawng Ramma law law gaw Chyum hpaji hpe madung hkaja ma ai. Ah Mi gaw hpa majaw ndai subject hpe lata ai rai?
Ah Mi; Myit lawm na lata ai re. Jawng Kaji kaw na ngai grai myit lawm ai. Awa ngai hpe galoi ma tsun ai ga langai nga ai “ Hpung sara/ma tai yang she Karai a sasana gun hpai ai nre ai, tinang galaw hkawm sa ai shani shagu na sak hkrung hkawm sa lam hta Hkristan kaja langai hku na sakse hkam hkawm sa ai mung sasana re.”

NN; Gara hku nna ndai jawng hpe lu lung ai kun?
Ah Mi; Karai Kasang a chyeju san san a majaw sha n-dai jawng kaw lu lung ai re.

NN; English laika hte seng nna yak hkak ai lam nga ai kun? Laika atsawm hkan lu ai kun?
Ah Mi; Um, N nga mat sai Sarama Kaba Ah Bu a chyeju a majaw ngai hta English laika hte seng na lak lak lai lai yak ai lam nnga ai hku re. Rai tim, M.A program hta nnan lung hpang ai shaloi laika gaw grai yak ai hku re. Nye a n-law n-la machye machyang a majaw sut masa hte mung masa hpaji ni hpe sharin hkam la hpang wa ai shaloi grai nan yak ai hku re. Manang ni hta grau aten jaw na hka ja ra ai, manang ni hta grau stress law ai hku re. Dai yak hkak ai ni kaw na nye matu grai manu dan ai hpaji ni hpe sharin hkam la lu ai majaw ngai grai myit dik ai.

NN; Ami ya jawng lung nga ai mungdan kaw tinang jinghpaw Wunpawng ramma kaga naw nga ai kun? Myen mung masha ni gaw nga ai kun?
Ah Mi; Prague, Charles University kaw jawng lung taw ai ngai hkrai re. Jinghpaw Wunpawng Ramma kaga n nga sai. Moi 2007-2008 Charles University Language Preparatory School kaw lung ai shaloi gaw Myan mung kaw na Karen jawng lung manang langai nga ai tim shi 2008 summer kaw Myanmung de nhtang wa mat sai. Jawng n lung ai Myen mung kaw na masha 50 jan ram nga ai. Hkang 40 jan (2009 ning July hkan kaw du wa ai ni rai ma ai) hte Myen 10 jan ram re.
Kalang lang Prague kaw nga ai People In Need NGO hte Film Academy kaw Myen mung kaw na Human Right Activists ni hte "Short documentary" gayet ai ni shata masum (shnr) laning mi Interns hku (shnr) learners hku sa ma ai.

NN; Ah Mi ni a jawng kaw hpa baw maigan amyu masha ni law ai rai?
Ah Mi; University ting kaw jawng ma 40,000 jan nga ai hku re. International jawng ma ni hta gaw American ni law dik htum re.
NN; Jinghku jingyu n nga ai maigan mungdan kaw langai hkrai nga ai shaloi yak hkak ai lam hpa nga ai kun?
Ah Mi; Yak hkak ai lam gaw hti ndang hkra nga ai hku re. CULTURE SHOCK hte HOME SICK gaw nye matu mang hkang kaba ni re.

NN; Jawng kade daram naw lung ra ai kun?
Ah Mi; One semester naw ra ai. Du na semester kaw gaw Thesis ka shangut sha rai sai.

NN; Ah Mi shinggan bungli ni mung galaw ai kun?
Ah Mi; Jawng lung ten hta gaw shinggan bungli n galaw byin ai. Summer kaw gaw ten daw chyen amu ni galaw byin ai. 2009 ning kaw Volunteer hku na gaw n-dai kaw du taw ai Hkang refugee ni kaw nye manang sasana sara hte rau shata mi kalang sa gawan byin ai. Shanhte myit kaji garen lam yawm na matu hte ra ai lam ni hta lu garum na matu. Ngut na nye manang ni galaw ai Homeless mission hta e shang lawm garum ai.
NN; Rau ai ten kaning re ai shara hkan wam hkawm chye ai rai?
Ah Mi; Rau ai ten ngai Laika buk seng kaba de sa na, ngai nlu mari hti ai laika buk ni sa hti dung dung re ai. Nu, Wa, kanau ni, bai nna ngai tsaw ra la ai nye kanu dim, manang ni hte shaga ai. Nye makau grup yin kaw na ngai tsaw ra ai, ngai hpe tsaw ra ai masha ni hpe aten jaw shaga ai hpe ngai ra sharawng ai.

NN; Jawng ngut jang hpa galaw mayu ai rai?
Ah Mi; Ngai sharin da ai hpaji hte nye makau grup yin a matu akyu rawng ai galaw mayu ai.

NN; Wunpawng ramma law law hpaji hparat lam hta myit mada ai daram hkaja na ahkang n lu ai ten maigan mungdan hta hpaji hka ja lu ai majaw gara hku hkam sha ai rai?
Ah Mi; Yak yak hkak hkak kaw na chyeju san san a majaw sha lu lung ai re majaw Wunpawng yawng a matu sha nrai, shingyim masha yawng a matu mu gun hpai na matu grau shakut ra ai ngu hkam sha ai. N-dai kaw maigan jawng lung ai ni sha chyeju hkam la ai ngu tsun mayu ai n re. Kaja nga yang, yawng hpe n bung ai chyeju kumhpa hpe Karai Wa gaw lajang da ya ai ngu hpe dum shangun mayu ai.

NN; Ya na zawn tinang a mungdan n re ai maigan mungdan de pru hkawm sa ai shaloi jawng laika n re ai sha kaga kaning re ai hpaji ni chye la lu ai kun?
Ah Mi; Sharin hkam la ai law law hta na lak lai ai langai gaw tinang hte nbung ai htung hkring, nga sat nga sa hta kaba wa ai masha amyu myu hte kanawn mazum chye wa ai. Shinggyim ahkaw ahkang hte seng na, masha langai hpe masha hku chye mu wa na matu sharin hkam la ai.

NN; Dai ni ramma law law dakkasu jawng ni hta nga ra na ten htingbu mungdan hkan tsinyam (refugee) hku nna nga pra let pu kan magam bungli shakut sha ra ai ni hpe gara hku tsun mayu ai rai?
Ah Mi; Tinang hkawm na ngu na lata da sai lam hta yak tim, dam dam nga tim, myit daw tim, shawng lam asin nga taw tim, myit n daw ai sha Karai Wa hta manoi let, ya lu taw ai ten hpe atsawm jai lang akyu jashawn hkawm sa yang kaja na re. Hpawt de na matu myit tsang taw na malai, dai ni na ten hpe atsawm sha kyu jashawn jai lang ai gaw grau mai kaja nga ai. Dai majaw myit n daw ga. Anhte yawng rau re ngu tsun mayu ai.

NN; Mungkan madang dep hpaji hpe tang du hkra hkaja lu ai Wunpawng ramma ni gaw grai naw yawm ai dai ni na ten hpaji chye ai Wunpawng Ramma ni a lit hpe kade daram chye na ai kun?
Ah Mi; Htaw lamau kaw na shata shagan ni yawng pawng let ning sin hpe ja htoi ai zawn anhte Wunpawng ramma ni yawng mung anhte a nsin chyip re Wunpawng shawng lam hpe jahtoi na matu lit nga nga ai. Solo travel nre sha yawng pawng let ja htoi ra ai ten du sai ngu mu ai.

NN; Malaysia kaw Wp tsinyam ni 4000 jan nga ai. Ndai kaw hpaji hparat hkaja mayu tim asak gaw kaba wa, ahkaw ahkang gaw n lu re ai ramma law law nga ai. Ndai ni hpe gara hku n-gun jaw mayu ai kun?
Ah Mi; Ngai kaw gaw hpa ahkaw ahkang, background mung n nga ai law, ngu nna hkum myit daw ngu tsun htet mayu ai. Tinang hkum tinang atsawm n yu ai sha gam maka hpe mara shagun taw yang gaw nsin tup re shawng lam hpe sha mu na, pru lam galoi n mu ai masha sha tai taw na re. Tsun mayu ai gaw, Shawng lam rawt jat lam chying hka gaw mu chye ai ni a matu galoi mung anga taw nga ai.
Ahkyak dik htum langai "Share" galaw dat mayu ai, anhte hta ya lu taw ai ya yang na ten hpe manu shadan let hkawm sa yang prat a manu dan lam hpe grau grau mu wa na re. Ngai grai ra ai Kung-fu Panda movie kaw na ga hpe quote galaw mayu ai “Yesterday is history, tomorrow is mystery, and today is a gift that’s why it is called present” da. Yawng tinang a gift hpe manu shadan jai lang lu ai ni tai u ga ngu Prague kaw na kyu hpyi dat ai law.