2010 Miss MKBC Shy. Hpauda Seng Nu hte San/htai

Personal Profile

Mying : Hpauda Seng Nu
Shangai nhtoi : 15th-April-1988
Asak : 22 ning
Hpaji tsang : 2nd Years (Law)
Magam bungli : Cashier
Kanu Kawa :Hpungtau Hpauda Ja La & Jan Marip Nang Awng

NN: :Hpa majaw ndai 2010 Miss MKBC shingjawng poi lamang hta shang lawm ai rai?
SENG: :MKBC a shawng nnan lang ngu na galaw ai Miss shingjawng poi re majaw myit lawm ai hta sha n-ga, grau nna gaw Hkrismat ten hta Karai Kasang a matu jut shara mi kaw na shang lawm apnawng mayu ai majaw ya na zawn hpung kaw na woi galaw ai ndai lamang hta shang lawm ai re.

NN: :Miss MKBC hku nna masat shagrau hkrum ai ten hkamsha ai lam hpe tsun dan rit.
SENG: :Shawng nnan Karai Kasang hpe chyeju dum ai. Ngai galaw taw ai bungli kaw ahkang la na grai yak ai. Raitim Karai Kasang kaw kyu hpyi apnawng da ai. Karai Kasang ahkang nga yang ngai hpe hkrismat poi jaw sa rit ngu. N chye tsun hkra grai kabu ai.

NN: :Seng Nu du mayu ai mungdan hte yaw shada tawn ai lam tsun dan rit.
SENG: :USA mungdan de sa nna nye a hpaji lam hpe matut hkaja mayu ai.

NN: :Ndai Cameroon highland hkrismat hkrunlam hpe gara hku mu mada ai rai? Hpa baw akyu ni lu la sai ngu hkam la ai rai?
SENG: :Buga de du mat ai zawn nga hkam sha ai. Katsi pyaw ai, grai tsawm ai hpalap sun ni, strawberry sun ni hte tourist ni hpe attractive galaw ai share re majaw myit hta asan nga nna grai pyaw ai.

NN: :Hkrismat nhtoi hta ndai zawn kumhpa shagrau hkrum ai majaw Hkristu a matu hpa bai sakjaw na myit shajin da ai rai?
SENG: :Ndai zawn kumhpa shagrau hkrum ai majaw n re sha, Hkristu a matu nga jang ngai kaw lu ai n-gun atsam hte dangdi dangdep ai ram/kaw na sak jaw apnawng na re.

NN: :Nang lu ai Miss MKBC arawng hpe gara hku jai lang na rai?
SENG: :MKBC a yaw shada da ai lam ni kaw ngai hku na shang lawm na. Bai nna, ngai hpe ma lam woi madun la rit ngu lajin mayu ai.

NN: :Prat manang yaw tawn ai nga sai kun? (snr) Kaning re ai prat manang hpe lata na yaw shada da ai rai?
SENG: :Tinang a ntsa chye na myit galu nna, Mayu Dama lahkawng maga de rap ra tsawra chye ai Wunpawng Shadang hpe myit mada ai.

NN: :Ndai Malaysia kaw nga ai ramma manaw manang ni hpe kaning ngu htet mayu ai rai?
SENG: :Mungkan hta manu dan laklai nna tsawm htap ai htunghking hpe lu tawn ai anhte Wunpawng amyu a ramma shayi shadang sha ni shada tsawra myit hte hkungga manu shadan nna, makawp maga hkat ga!

Shayi Hpauda Seng Nu hte shachyen shaga hku hkau mayu ai ni a matu matut mahkai hkringdat;-

Phone;- (+6) 017 3069 382
zionshayi@gmail.com
9 floor, Block D, Danau Kota Flat, Setapak.

"MYU SHAYI" Women Project UNHCR kaw na shagrau masat lu

Shagrau masat laika pa hte rau Saranum Kareng Myu Pan

Saranum Kareng Myu Pan (Grace) lit la woi awn galaw nga ai "MYU SHAYI" Women Project gaw UNHCR kaw na ningtawn masat shagrau laika pa hpe lai wa sai 14th-December-2010 ya shani hkam la lu sai re.

"MYU SHAYI" project gaw UNHCR kaw na arang gumhpraw hte tinang a uhpung uhpawng kata na tsinyam amyu shayi ni a prat rawt jat galu kaba wa na hpe yaw shada let Jak Chywi (Sewing), ta hkri (Knitting) hpaji ni hpe wunkat jaw sharin ya nga ai re.

Lai wa sai shaning kaw na hpang wa ai ndai project kaw na galaw ai jak chywi wunkat hta amyu shayi marai (6), ta hkri wunkat hta marai (10) hpe awng dang ai hte sharit shalat ya lu sai re.

UNHCR na shagrau masat lu la ai Wunpawng Amyu shayi ni

Matut nna shagrau masat lu ai ndai amyu shayi ni gaw UNHCR kaw na jep chyoi ai Jak chywi san poi (Tailoring Exam) hta mung shang htai awng dang lu sai re.

Rai chywi hpung ni gaw labu, palawng, bawchyawp, du bat ni hpe order hkap la chywi nga sai hta n-ga, matut nna mung jak rung kaba ni hte matut mahkai nna gat lawk tam shakut nga ma ai re.

Ta hkri hpung ni mung hka tau htingba (Water bottle holder) zawn re ai kun rai hte kaga asung shang ai rai ni law law hpe myit sawn shapraw nhtawm, gyin shalat shakut nga ma ai re.

Srn. Kareng Myu Pan hpe shagrau masat laika pa lu la ai hte seng nna san yu yang, "Ndai shagrau masat laika pa gaw project hpung shagu hpe jaw ai n re. Shanhte (UNHCR) hku nna awngdang ai ngu mu mada ai ni hpe jaw ma ai re.
Anhte lai wa sai shaning na masa hte shingdaw yu yang ya ten gaw tsinyam amyu shayi ni grau nna akyu hkam sha lu sai re.
Nu num ni tinang a nta kaw nga nna amu bungli galaw lu sai majaw dinghku a matu grai wa myit tsang n ra sai, hta n-ga na shimlum lam mung lu la sai re. Ya matut nna Wunpawng Amyu shayi ni law law hpe shakut jahpan na masing ni mung nga ga ai." nga nna tsun dan ai.

Bai, "Cameroon Highland hta galaw ai Miss MKBC 2010 shingjawng poi hta "Best Costume Design" gaw jak chywi hpung hta lawm ai Shy. Mai Mai hte Ah Tsai yan gyin shalat ai re" nga nna shi matut tsun dan ai.

Matut nna dai ning 2011 ning hta mung madang tsaw jak chywi wunkat hpe bai sharin ya na masing nga ai hpe chye lu ai re.

Project lithkam Srn. Kareng Myu Pan kaw nna,"Anhte Wunpawng sha ni shada tinang a amyu shayi Nu Num ni galaw nga ai ndai magam bungli hpe n-gun jaw ga! Htunghking labu palawng, hkungran poi labu palawng hte kaga tinang ra ai design yawng myit dik ai hku order sa ap mai ai." nga nna saw shaga ai.

Wunkat hte seng nna san sagawn mayu ai mi rai rai, labu palawng chywi mayu ai rai rai lawu na matut mahkai hkringdat ni hpe shaga mai nga ai.

Srn. Kareng Myu Pan (Ph. 012-9152671)
Project Lithkam
Srn. Ja Hpa (Ph. 017-6780210)
Srn. Mayram Wadam (Ph. 017-2383514)

MARIT MAROI DUM NGA NA SAI CAMERON HKRISMAT HKRUNLAM

Cameron Bum tsaw ntsa na hkrismat manau

Ka ai; Naura Shadang

Du hkra ladaw kashung katsi ai Cameron bum tsaw n tsa de December 24 ya kaw na 26 ya du hkra masum ya sa galaw na 2010, MKBC hkrismat poi lamang sa lawm na matu Kuala Lumpur, Pudu Nawku jawng hta jahpawt nhtoi san n san re ai aten kaw na sa du shinggyin nga ai nawku hpung masha ni gaw marai 400 daram rai nga ai.

Manap jau jau hkying 06:00am kaw masha zup ten ngu tsun da ai majaw, mawdaw rawt ten hpang hkrat na tsang ai hpung masha ni law law wa taxi manu htam lahkawng jaw nna sa du nga ma ai re. “Merry Christmas!”, nga ai shakram ga hte n hkrum ai na sai manang langai hte langai kabu gara shachyen shaga hkat ai n-sen gaw garu hte chyi she rai nga ai.

Yawng a myi man nsam gaw mani sum sai rai kabu pyaw ai nsam hte hkrismat hkrun lam a matu myit rawt ai nsam ni dan dawng nga lu ai. Mahkawn shabrang ni hpe gaw Kachin Refugee ni re ngu yang pyi yu shut na zawn rai hkra aging lan ( vef;) taw nga ai. Poi zau zau ai nu num ni mung ma ba let kaming kamawng re ai masha uhpung a lapran matep nang ai hpe mu lu nga ai.

Ngai mung n hkrum ai laning mi daram na mat sai shawng de ‘construction’ kaw bungli rau galaw wa ai manang wa Hkau Brang Gam hte bai hkrum nna grai kabu ai hte “Aga! hkau nang mung sa ai i?” ngu shaga hpang dat yang shi bai tsun ai gaw; “Ya, ngai na bungli gaw lu sha seng kaw re. Lani mi hkying hkum 11:30, shata mi hkringsa nhtoi (2) ya re. Hkrismat hkrun lam gaw (3 ya) nga re majaw Lauban hpe hkang hpyi yu ai. N lu ai majaw bungli jang pru kau sai. Hkrismat na wa jang she kaga lusha seng hkan bai hkan tam la na.” nga nna tsun dan wa ai.

Shaloi gaw hkrismat poi hta manau mung dum na re nga majaw n lu lu hkra sa na ngu ai myit hte hkum n pyaw taw ai nye a tsawra nja hpe pyi ngam kau da nna poi zau zau ai ngai mung nau wa ladu gaw n lai nga ai ngu myit awai la lu ni ai.

Manap 10:00am daram hta gaw anhte ni a Bus mawdaw langai hpang langai KL kaw rawt hpang wa saga ai. Mawdaw kata na lam dingyang mu lu ai wahpang nta kaba ni, htap hte htap galaw da ai lam mahkrai ni, pri nem ai kattaya lam nmaw ni hpe yu nna grai naw gritnem hpanghkrat nga ai nye a buga hpe dum shingran wa nngai. Anhte mungdan a hpang (9) ning hpang hkrat nna she shanglawt lu ai Malaysia mungdan wa dai ni gaw anhte hta grau rawt jat nna anhte mahtang tsinyam masha hku nna bai sa du shingbyi nga ra ai hpe dum shai shagu kadai hpe she mara n chye shagun, kraw kata masin nsi maroi nni ai zawn she hkam sha wa nngai.

Kuala Lumpur Mare Kaba a shinggan de du mat wa ai kaw nna gaw ma-un sau hpun ni hpe lam a pai hkra mada n-htum hkra mu lu yang, ja lungseng sha htu alai sha nna hkai sun bungli hpe matsan bungli zawn nawn chye ai anhte myu ni a myit jasat hpe dum shai lu nngai.

Malaysia du ai kaw na lu sha seng e shat ban kashin, saboi katsut nna shata nhtoi shalai wa ai masum ning rai sai. Cameron Highland ngu ai hpe jahkring hkring na ga tim kalang mi mung n du yu ai. Grau nna Malay 'Ga' hta n nga ai “Cameron” ngu ai mying hpe hpa majaw shamying lang ma ai kun? ngu nna mung grai chye mayu ai majaw sawk yu yang, “Cameron Highland ngu ai mying gaw 1885 ning hta ndai ginra hpe lamu ga sumla ka lajang na matu Britisha Colony Asuya kawn lit shatsam da hkrum ai “William Cameron” a mying hpe la nna shamying ai re hpe chye lu ai re.

Cameron Highland gaw, dingdung de Kelantan mungdaw, sinna de Perak mungdaw ni hte jarit mayan din nhtawm, Pahang mungdaw a Sinna-Dingdung jut maga e nga ai ginwang rai nga ai. Ndai ginwang gaw, Ringlet, Tanah Rata hte Ulu Telom ngu ai ginwang daw masum hpe kahkyin tawn ai re. Pahang mungdaw a kaji htum ginwang rai nna, square kilometres 712 dam pa nga ai. Anhte Wunpawng sha ni law malawng nga ai Kuala Lumpur Mare kaba kaw na gaw Kilometres 200 daram tsan nga ai.

Panglai shadang kaw na Pe-5062 (1543 m) tsaw ai shara rai nna, shani aten gaw kahtet shadang 20'C rai nna shana aten e gaw kahtet masat 10'C n-pu de pyi du chye nga ai.

Kashung katsi ai hte ga sau kaja ai lamu ga re majaw ndai ginwang na masha ni gaw hkai lu hkai sha hpe madung dat ma ai. Namlaw namlap hte namsi namsaw sun ni hpe mung shara magup mu lu nga ai. Ndai ginwang gaw Malaysia mungdan hta nampan hte hpalap kunrai hpe law dik shapraw lu ai ginwang hku nna mung mying kajai gumhkawng ai re. Ndai shara na nampan sun ni daram tsawm ai shara hpe Malaysia mungdan gara shara kaw mung mu lu na n re nga nna mung buga masha ni tsun arawng la chye ma ai.

Ndai Bum tsaw dabang sara (hill resort) hpe gaw 1920 ning jan hta British ni shawng de hpang wa ma ai re. Malaysia mungdan a laklai ai hte mying gumhkawng dik sara langai rai nna bum shagawng ntsa de tawn ai sa ra (hill resort) ni hta kaba dik rai nga ai. Colony prat na English mare kahtawng, dum nta hkrang hpe dai ni du hkra gawn hkang tawn ai majaw myi chyaw mu la saga ai.

Anhte sa zuphpawng ai shara gaw Methodist Miwa nawku hpung ni a 100 ning hpring masat ginra “Chefoo Centre” ngu ai ginra rai nga ai. Ndai ginra gaw acre 6 kaba nna bum maling ni hte shinggrup tawn ai katsi pyaw simsa ai shara rai nga ai. Brinchang mare a shinggan e sha rai nna Tanah Rata Mare kaw na kilometer 5 daram tsan nga ai.

Shana de hkying 4:00pm daram hta ngai jawn nang ai Bus mawdaw anhte hkring na Chefoo Ginra de du shang wa ai shaloi gaw manang ni jau jau sa hkyen lajang da ai Manau Shadung gaw anhte hpe hkap tau la ai zawn ah shingkang rai tsawm la ai hpe mu lu nga ai.

Mahkyen lamang hta gaw du ai December 24 ya shana de 3:00pm-6:00 lapran manau nau baw hpang na matu tau hkyen lajang tawn tim lamu marang a majaw nau baw mahkyen hpe hpang shani de sit kau ra saga ai. Dai shana na lamang hta du sa ai ramma ni shada da grau hkau chyam wa hkra “Social Game” ginsup lamang hpe KRC ningbaw Sara Labang Naw Seng woi awn ai hte yawng kabu gara shanglawm ginsup saga ai. Ginsup lamang ngut ai hpang Hkrismat yungwi pinra lamang galaw nna, yuptung ten hta gaw hkrismat hkaptau nawku hpawng hpe yawng kabu gara nawku dawjau shanglawm ai hte, anhte a MKBC Hpungup sara Rev. Dingshu La Hkawng a hkrismat mungga hpe mung madat hkam la lu saga ai.

December 25 ya jahpawt manap 7:00am hta gaw anhte ni yawng la dingda nga ai Hkrismat manau nau baw hpang na re majaw manap nhtoi san nsan re ai aten kaw na rawt nna kashung katsi ai du hkra ladaw hpe ninghkap let hka rawt shin ai ni gaw hka shin gawk ni she chyat kabrat nga ai.

Ngai mung manau nau na matu naura pa de pru wa ai shaloi gaw Wunpawng shayi ni tsawm htap ai Hkahku hking, Manmaw hking, Maru, Lashi, Zaiwa, Lisu, Rawang hking ni bu hpun nna sumla dep ai ni gaw dep, le de aw de kahkrang hkawm ai ni gaw hkawm rai nga ai hpe mu ai shaloi nye a myi hta yu n hkru hkraw ni ai. Lagaw lahkam htawt ai hte rau ngoi pru ai amyu shadang ni a jinghpaw nhpye na soi hte amyu shayi ni a palawng sinda na soi nsen ni gaw nye a na hta na ra sharawng dik la nngai. Mu lu ai makau grupyin hte na lu nga sai manau dumba nsen ni gaw ngai hpe Myitkyina Shatapru manau pa na manoi poi kaba ni hpe bai dum shingran shangun nga ai.

Ndai zawn maigan mungdan hta du nga ai raitim, hkrit tsang n ra ai sha wang lu wang la manau nau lu na re shaloi gaw, tinang a mungdaw, tinang a dailup daihpang ga e nga nna wanglu wanglang manau nau na ahkang pyi n lu ai anhte buga na Wunpawng sha ni a gam maka hpe dum dat yang mi pyaw nga ai myit ni pyi hkoi mat ni ai.

Yawng naura pa de hkum hkum ra ra du ai shaloi gaw Anhte a MKBC hpungup Sara Rev. Dingshu La Hkawng kaw nna akyu hpyi apnawng ai hte manau nau hpang wa saga ai. Manau wang hpe kalang lahkawng lang shinggrup ai hpang gaw shawng shani marang htu tawn ai majaw madi manyap rai nga ai tsingdu pa gaw yinam ta na hkauna pa zawn byin mat sai re. Manau pa hkumpup prang gale mat tim manau nau ai ni mung n shayawm ga ai. Amyu shayi ni hkyepdin rau kau hkra katsi ai numri prang hta aw..ra..ra...nau..pa...pa ai hku re. Shaman shakyang da ai lam n nga ai majaw manau nau ai shaloi ka hkrang n ru n ra raitim, Hpan sagya kaw na shaman chyeju la ai lachyum hku nna galaw ai Oh..le..le...Wooo.... nga marawn ai shaloi gaw yawng a mahku nsen ni ra nga ai. Manau dum ai nsen hte aw ra ra ai nsen gaw naura pa hpe shinggrup tawn ai makau grupyin bum marawn yawng de hpungtang she kashaw nga ai.

Manap manau nau ngut ai hpang shani kaang gaw Hkrismat akyu hpyi hpawng kaba hpe galaw saga ai. Ndai hkrismat hpawng hta Jinghpaw mung na du sa ai Myitkyina Ginwang La Komiti hpaawn mung rai nga ai Rev. Maran La Doi a Hkrismat mungga hpe mung madat hkam la lu saga ai. Shana gaw ramma shayi shadang ni a yungwi pinra lamang hte Miss MKBC 2010 shingjawng lamang ni hpe yu n-gun jaw lu saga ai.

Hpang jahtum shani ngu na December 26 ya manap jau jau hta gaw apnawng nawku hpawng galaw la ngut ai hpang hkrismat manau nau gup hpe mung kabu gara jawm nau lu saga ai. Dai hpang chyingdaw hkying 11:00am hta gaw KL de bai rawt wa saga ai. Bai wa ai hkrunlam hta mung Strawberry sun, hpalap sun ni hkan shang chyai yu wam hkawm lu ga ai. Kilometer 50 daram galu ai magyi magaw bum shagawng hpe lai di yu ngut nna pa layang du wa mahka hka rum hkringsa shara hta mung hkringsa yu hkawm lu ga ai re.

Ninghtoi 3 ya, 2 na hkrismat hkrunlam ndai hta yup shara n law ai manghkang, malu masha mayak mahkak hte kashung katsi dik ai manap hta hka katsi hte hka shin ra nna hka shin nga ninglen hka n sa mat ai zawn re yak hkak lam ni mung marit maroi dum shai lu na matu ngam nga sai hku re.

Hkye la Madu Yesu Hkristu shangai wa ai ndai hkrismat poi lamang hta Wenyi nshaw nshat hkrismat mungga ni na la lu ai hta sha n-ga Wunpawng sha ni a myithkrum masat kumla rai nga ai manau hpe mung myit hkrum myitra nau la lu sai re. Dai hta n-ga, nam maling kata pyaw chye ai Wunpawng sha ni a matu tsit tsawm ai bum maling lapran hta 3 ya tup san seng ai nbung katsi marawp let sa du ban sa la lu ai majaw shaning dingsa a pu ba yawng hkoi nna shaning nnan a matu mung n-gun awai la lu saga ai.

Marit maroi dum shingran nga na 2010 Cameron Hkrismat hkrunlam byin tai awng dang hkrang shakut shaja apnawng wa sai Poi shabyin shatai komiti hte Malaysia Jinghpaw Wunpawng Hkalup Hpung MKBC buga hpung hpe na chying wa kabu chyeju dum n ma rai nga sai law....