Naura ShadangNINGNAW, 2-May-2010, Sunday
Myen mungdan kata mung masa shagyip shagyeng ai majaw Malaysia mungdan de hprawng sa wa ai tsinyam masha ni hpe makawp maga shimlam jaw na matu, United Nation High Commissioner For Refugee (UNHCR) kaw na myitsu salang ni gaw seng ang ai Malaysia Asuya hpe shadut dat sai re.
Jinghpaw mung kata zingri zingrat dip sha hkrum ai majaw Malaysia mungdan de hprawng sa wa ai Wunpawng tsinyam ni gaw 8 ning laman 4000 jan wa sai hpe KRC a jahpan hte maren chye lu ai. Ndai zawn hprawng sa wa ai tsinyam ni gaw Jinghpaw Wunpawng myusha ni sha nrai, kaga myu baw sang ni law law mung lawm nga ai.
Lai wa sai March shata na UNHCR-Malaysia rung a sumtang jahpan hte maren nga yang, Malaysia mungdan hta mung masa shingbyi ahkang lu na matu tsinyam hku nna mying jahpan bang da ai masha 86,000 nga ai re. Dai kaw na tsa lam shadang 92 gaw Myen mung kaw na re nga nna UNHCR salang ni tsun ma ai.
Myen mung kaw na hprawng sa wa ai myu bawsang tsinyam ni law law nga ai raitim, yawng gaw tsinyam masat hkrum ai n rai nga ai. Law malawng gaw Myen mung kata makam masham, mung masa dip up sai chyup hkrum ai majaw Malaysia de hprawng sa wa ai rai nga ai.
UNHCR myitsu salang ni gaw Malaysia daru magam ahkang aya lu ai ni hku nna, tsinyam ni a prat grau rawt jat wa hkra lam mahkrun tam nna, garum shingtau ging ai nga nna tsun madi madun nga ai re. Malaysia mungdan hte seng ai UNHCR dat kasa Alan Venon gaw, tsinyam ni a shawng lam hte seng nna ndai zawn tsun wa ai.
"Malaysia mungdan kaw tsinyam ni a masa lam grau kaja wa hkra garum shingtau lu na ahkaw ahkang ni grai law hkra nga nga ai. Prat maka n tsawm nna, tinang a mungdan hta sa shingbyi nga ai tsinyam ni tinang lagaw tinang tsap lu hkra, bai nna manghkang ni hpe hparan lu ai aten ladaw langai du hkra garum madi shadaw lu ai mungdan langai hku nna arawng la lu na ahkaw ahkang ni nga nga ai re ngu ngai tsun mayu ai."
Kuala Lumpur hta nga ai Jinghpaw amyu shayi langai mung, shi a nga pra lam hpe ya na zawn tsun dan wa ai.
"Jinghpaw mung kaw nga ai shaloi gaw Myen Hpyen Asuya dip zingri ai raitim, tinang a nta wang hte tinang sha gaw lu nga ai. Ndai Malaysia kaw she gawk kaji langai kaw marai 20 jan jan matsut matsat nga ra ai. Masha gaw law, hka shin gawk, nam dum gaw kashun ra. Kalang lang gaw nsa sa pyi n hkru ai."
Malaysia mungdan gaw maigan bungli masha wan 2 hpe hkap la da nga ai mungdan mung rai nga ai. Ndai mungdan hta du wa ai bungli masha, tsinyam masha ni a ntsa Asuya a kanawn mazum ai lam hte seng nna jahkring hkring mung dinglun hkrum nga ai re.
Lai wa sai March shata kaw sha mung, Mundan ga daga mara raw ahkang (Amnesty International) ngu ai wuhpung gaw Malaysia mungdan hta bungli madu ni kaw nna bungli masha ni a ntsa amyat htuk sai chyup ai, Balik ni gumhpraw mawp sha ai, laja lana yam sha ai lam ni hte seng nna sumtang langai ndau shapraw wa sai re.
Lai wa sai shaning June shata hta ndau ai American Maigan Kyit Hkai Dap a Masha Hpaga Lam Sumtang hta mung Malaysia Asuya ahkaw ahkang nga ai ni nan maigan na shang wa ai ni hpe mawp lu mawp sha, masha hpaga la ni hpang de dut sha ai lam ni nga ai nga nna dinglun da ai re.
Jinghpaw hpawmi langai mung Malaysia kaw n kam nga sai lam n dai hku tsun wa ai.
"Mung masa a majaw sha nye nta masha hte ayai aya ndai hku bra nga ra ai. Ahkaw ahkang lu ai lani mi gaw Malaysia kaw n kam nga sai. Nta masha ni hte n kam hka sai."
Malaysia mungdan hta tsinyam ni a prat grau kaja wa na matu gaw seng ai Balik hte bungli madu ni kaw na shinggyim nau nau myit rawng let galai shai ai lam galaw ra ai nga nna, Shinggyim ahkaw ahkang shamu shamawt ai ni gaw tsun nga dingyang rai nga ai.
Maigan chyam bra nga ai Myen mung masha law law gaw Myen hpyen ningbaw ni myit malai nna mungdan hpe ngwi pyaw sim sa hkra woi galaw ya ai shani she tinang buga de asim asa bai wa lu na hpe myit mada nga ma ai re.
No comments:
Post a Comment