Malaysia Jinghpaw Wunpawng Myusha ni Shawa n-gun madun

Malaysia Jinghpaw Wunpawng Myusha ni Shawa n-gun madun


Naura Shadang
Friday, 24-June-2011

Malaysia du Jinghpaw Wunpawng Myusha ni shawa n-gun 400 daram gaw dai hpawt manap Malaysia aten hkying 09:00am kawn 10:00am du hkra Kuala Lumpur hta nga ai Myen dat kasa rung kaw Myen asuya hpe ninghkap ai shawa n-gun madun lamang galaw wa sai.

Ndai shawa n-gun madun lamang hta sak ram ai ramma ni sha n-ga amyu shayi ni, ma kaji hte sak kung ni mung sa du shang lawm wa sai re. Shawa n-gun madun ai ni gaw "Hpyen asuya n ra sharawng ai" "Gumshem majan n ra ai" "Teng man ai lam hpe ra ai" "Amyu shayi ni hpe
roi rip ai lam hkring u!" ngu ai zawn re ndau pyen pa ni hpe sharawt n-htawm Myen Ausya hpe n ra sharawng ai lam htawng madun wa sai re.

Ndai zawn shawa n-gun madun ai a madung gaw lai wa sai June shata praw 9 ya shani kaw nna Myen Asuya Hpyen Dap ni kawn Wunpawng Mungdan Shanglawt Hpung (KIO) a uphkang ginra de tawt lai majan hpaw hpang wa ai hpe n ra sharawng ai majaw re lam lamang woi awn ai ningbawn ni kawn chye lu ai.

Malaysia na Jinghpaw Wunpawng myusha ni Myen dat kasa rung kawn Myen Asuya nnan a gumsan magam Thein Sein hpang de ka ai laika hta Myen Asuya Hpyen Hpung ni kawn majan hta mungdan ga daga tara n lang ai hta sha n-ga, majan byin ai ginra ni hta buga masha ni hpe
zingri sat ai, amyu shayi ni hpe roi rip ai, mung shawa hpe porter lahkawn ai hte ma kaji ni hpe du hkra shinggyim htung tara n lang ai sha zingri sat ai lam ni hpe ninghkap tawn nga ai re.

Bai nna, ndai zawn re Ausya hpyen hpung ni a sat lawat gaw Asuya nnan a sari hpe hkra ai hta sha n-ga, Amyu sha myit hkrum kahkyin gumdin lam hta mung hkra machyi wa na re lam hpe sadi jaw tawn nga ai.

Hpyi shawn tawn ai lam ni hta gaw;-
1. Myen Hpyen Hpung kawn gumshem majan hpe jahkring nhtawm, jat tawn ai hpyen n-gun ni hpe dawm ya na matu,
2. Myen Hpyen hpung ni a shinggyim ahkaw ahkang tawt lai ai lam hte shinggyim nau na myit kata ai sat lawat ni hpe jahkring na matu,
3. Ya ten byin nga ai hpyen masa lam manghkang hpe simsa ai ladat hte hparan nhtawm, tara shang ai simla lam bawng ban na matu, hpyi lajin taw nga ai.

Malaysia mungdan gaw Myen hte grai hku hkau ai jinghku mungdan langai re majaw ndai zawn Wunpawng sha ni shawa n-gun madun lamang galaw ai lam hta mung yak hkak dut dang ai lam law law a lapran kaw na shakut galaw ai re lam hpe chye lu ai.