Nu n chye shi ai lam ni...

Nu n chye shi ai lam ni...

Cartoon langai kaw hti ga ai. Hpaw mi lahkawng gat sa lam kaw hkrum nna langai mi jan gaw kaga langai hpe tsun ai.

"Nye madu wa gaw maigan de le. Ma Gam mung maigan de sha re. Ma Kaw chyawm gaw ndai kaw jawng lung nga ai."
"Re i?.. Ning! Dai rai jang Ning hpa rai n hkan sa ai law?"
"Uhm.. ngai gaw shakawng mayu na ngam taw ai le." da.

Ndai cartoon kaw na kanu tsun dan ai re. Nu gaw she tsun u ga le. Hpa majaw nga yang Nu n chye shi ai lam ni law law nga ai gaw.
"Re! maigan kaw lam ni grai kaja ai. Mare ting san seng ma ai. Myi hprap wan mung tsun n ra ai." da.

Nu gaw manang ni hte hkrum shagu dai hku tsun na re. Raitim Nu atsun taw nga ai Maigan ga grai kaja ai ngu ai hpe ngai n lu hkap la ai, Nu.

Kaja wa nga yang maigan ga gaw grai kaja ai n re. Ndai ni yawng gaw yu maya sha re. Kataya lam ni hku n hku ai hpe grai kaja ai ngu tsun lu na i? Lam makau kaw maza n nga ai hpe mung grai kaja ai ngu tsun na i? Myi hprap wan dip hpaw dat shagu sa ai, Bus car ni, mare shinggrup Wan leng ni aten man taw ai gaw mau hpa wa re kun? Nye matu ndai yawng gaw grai kaja taw ai ngu n hkap la ai, Nu. Ndai yawng gaw yu maya sha re. Anhte kaw she yu maya n lu byin taw ai le. Dai majaw maigan ga grai kaja ai ngu tsun yang nau n ra sharawng ai, Nu.

Shanhte ni kaw hkrang rai ni (Material) rawt jat ai lam gaw lamu ndung du hkra re. Raitim ngai ndai kaw chye nga sai. Shanhte zawn ngai hkan nga lu sai. Mungkan madap dep ai ngu tsun yang chyawm Nu shut mat na re. Ngai gaw aten tup Nu a nta wa na chyu sha myit sumru taw ai wa she re.

"Hkum wa! ndai kaw jan ja, ninghpu mawng, ji grawng kawa, myi hprap wan n lu ai" ngu gaw hkum tsun yaw... Nu!
Nu a kasha gaw Air cond gawk n ra nna jan lagaw hpe marit ai wa, n-bung ahpawt ai ten ninghpu sama hpe Air fresher hta grau ra ai wa, ningsin kata layit hte ji grawng kayet nna mung jahta ai hpe grau marit ai wa re hpe Nu hkum chye u ga le!

Masha n-kau tsun ma ai. Maigan kaw hpaji chye atsam rawng na sha ahkyak ai. Hpaji chye jang yawng maren sha re.
Ya gaw Globalization byin taw sai. Buga ginra marit taw n-mai sai. Tsit lali ai udat shara de prat hpe rawt jat hkra gaw gap ra ai da.

Langai mi san mayu ai. Mungkan ga gaw kaja wa Kahtawng mare kaba byin nga sai kun? Amyu, sai ginghka ai lam n nga sai kun? Nye a ga san hpe Nu mung myit yu u le! Nu e.. ngai shadu yang mungkan ga gaw jak hpaji hta lai nna, gara lam hta mung kaja wa Globalize n byin shi ai ngu shadu ai... Nu!

Anhte zawn re mungdan na sa ai masha ni hpe hkrang rai (Material) rawt jat galu kaba nga sai mungdan na masha ni gara hku mu mada ai ngu hpe Nu n chye ai gaw. Dai ni gaw rai nu ga law.. Azin ayang tsun yang Nu myit n pyaw taw na. Kalang lang gaw nye hkum ngai jak masha zawn nawn wa nngai. Bungli galaw nga ai gaw kaja wa shat sha na matu zawn sha rai taw ai...Nu.

Moi... Nu a nta kaw bungli galaw ai pyi lachyum lama ma naw nga ai zawn re. Ya gaw, hpa mung lachyum n nga ai zawn sha hkam sha ai. Tinang mungdan kaw galaw nga ai pyi gaw tinang amyu, tinang buga a matu rai rai, n rai rai, lama ma gaw akyu naw nga na re. Ngai hpe myit gyip gyeng ai ngu tsun tim myit dik myit pyaw let sha hkam la na nngai. Dai daram wa ting myu tsaw yang hpa majaw maigan pru wa ai rai? ngu mara shagun na gaw hkum jau shi!

Kalang sha sa pra ai prat hta masha ni a madang zawn sha pyi gaw nga mayu ai le. Uhm.. yak ai gaw ya na zawn, lu lu, sha lu hkra Nu a nta nga nna ngai n lu tam ai le... Nu e. Ngai she hpyang taw ai kun? Tsit lali ai udat shara ngu yang anhte buga gaw hkun hkraw taw sai kun? Ngai n chye myit mat ni ai.

Nu n chye shi ai grai naw law ai law. Ga shadawn, Digital yup jasu nayi nsen kade daram n rawn hpa re ngu hpe Nu hkam sha ga jang she chye na re. Nu ni hpang de gaw masha ni arawng mi ala rai lang nga ai hand phone gaw anhte a matu "Nga dingsi" gali da ai hte hpa n shai ai ngu hpe Nu n chye ai gaw.

Ndai kaw hkrang arai ni grai kaja ai ngu hpe ngai n ningdang ai...Nu. Raitim laika ka sara langai tsun ai zawn, "U lawng hpe sha tsi chya shatsawm nna kata na u kasha hpe shat n jaw yang hpa lachyum pru na rai?" da.

Ndai kaw, Ja ulawng kata kaw lasi lamun rai nga ai u kasha ni grai mu ga nna dai zawn gaw n kam byin ai... Nu e. Ngai gaw, aten du jang Nu a nta wa lu hkra shakut nga ai. Nu e... Nye kasha, maigan kaw grai asin pye nga ai ngu gaw htingbu ni hpe hkum shakawng yaw... Nu. Nye kasha gaw Kanu a nta hpe grai chye marit ai ngu she shakawng u yaw...

Aten masa langai du jang Nu a kasha bai wa na re... Kaning re ai aten masa ngu gaw hkum san yaw... Nu.
Lani mi na aten masa hta le.

Lamu samwi