2010 Miss MKBC Shy. Hpauda Seng Nu hte San/htai

Personal Profile

Mying : Hpauda Seng Nu
Shangai nhtoi : 15th-April-1988
Asak : 22 ning
Hpaji tsang : 2nd Years (Law)
Magam bungli : Cashier
Kanu Kawa :Hpungtau Hpauda Ja La & Jan Marip Nang Awng

NN: :Hpa majaw ndai 2010 Miss MKBC shingjawng poi lamang hta shang lawm ai rai?
SENG: :MKBC a shawng nnan lang ngu na galaw ai Miss shingjawng poi re majaw myit lawm ai hta sha n-ga, grau nna gaw Hkrismat ten hta Karai Kasang a matu jut shara mi kaw na shang lawm apnawng mayu ai majaw ya na zawn hpung kaw na woi galaw ai ndai lamang hta shang lawm ai re.

NN: :Miss MKBC hku nna masat shagrau hkrum ai ten hkamsha ai lam hpe tsun dan rit.
SENG: :Shawng nnan Karai Kasang hpe chyeju dum ai. Ngai galaw taw ai bungli kaw ahkang la na grai yak ai. Raitim Karai Kasang kaw kyu hpyi apnawng da ai. Karai Kasang ahkang nga yang ngai hpe hkrismat poi jaw sa rit ngu. N chye tsun hkra grai kabu ai.

NN: :Seng Nu du mayu ai mungdan hte yaw shada tawn ai lam tsun dan rit.
SENG: :USA mungdan de sa nna nye a hpaji lam hpe matut hkaja mayu ai.

NN: :Ndai Cameroon highland hkrismat hkrunlam hpe gara hku mu mada ai rai? Hpa baw akyu ni lu la sai ngu hkam la ai rai?
SENG: :Buga de du mat ai zawn nga hkam sha ai. Katsi pyaw ai, grai tsawm ai hpalap sun ni, strawberry sun ni hte tourist ni hpe attractive galaw ai share re majaw myit hta asan nga nna grai pyaw ai.

NN: :Hkrismat nhtoi hta ndai zawn kumhpa shagrau hkrum ai majaw Hkristu a matu hpa bai sakjaw na myit shajin da ai rai?
SENG: :Ndai zawn kumhpa shagrau hkrum ai majaw n re sha, Hkristu a matu nga jang ngai kaw lu ai n-gun atsam hte dangdi dangdep ai ram/kaw na sak jaw apnawng na re.

NN: :Nang lu ai Miss MKBC arawng hpe gara hku jai lang na rai?
SENG: :MKBC a yaw shada da ai lam ni kaw ngai hku na shang lawm na. Bai nna, ngai hpe ma lam woi madun la rit ngu lajin mayu ai.

NN: :Prat manang yaw tawn ai nga sai kun? (snr) Kaning re ai prat manang hpe lata na yaw shada da ai rai?
SENG: :Tinang a ntsa chye na myit galu nna, Mayu Dama lahkawng maga de rap ra tsawra chye ai Wunpawng Shadang hpe myit mada ai.

NN: :Ndai Malaysia kaw nga ai ramma manaw manang ni hpe kaning ngu htet mayu ai rai?
SENG: :Mungkan hta manu dan laklai nna tsawm htap ai htunghking hpe lu tawn ai anhte Wunpawng amyu a ramma shayi shadang sha ni shada tsawra myit hte hkungga manu shadan nna, makawp maga hkat ga!

Shayi Hpauda Seng Nu hte shachyen shaga hku hkau mayu ai ni a matu matut mahkai hkringdat;-

Phone;- (+6) 017 3069 382
zionshayi@gmail.com
9 floor, Block D, Danau Kota Flat, Setapak.

“Solo travel n re sha, yawng pawng nna jahtoi ga!” nga tsun ai Hparat Hkawn @ Ah Mi hte San / Htai

“Solo travel n re sha, yawng pawng nna jahtoi ga!” nga tsun ai Hparat Hkawn @ Ah Mi hte San / Htai

Naura Shadang
NINGNAW, 25-May-2010

Dai ni na ten Wunpawng Ramma ni Mungkan Secular hpaji hpe madang dep ai mungkan a jawng kaba ni hta hpaji hkaja nga ai jahpan gaw grai wa n law shi ai re. Ndai zawn n law la ai kaw na langai rai nga ai, Czech Republic mungdan Prague Mare kaba kaw Internatioanl Economics & Political hpaji hpe hkaja nga ai KBC Amu Madu Kaba Rev. Dr. Hkalam Sam Son a kasha Shayi Hparat Hkawn hpe KRC Ningnaw Jouranal kaw nna email hte san / htai galaw da ai re. Lak lai ai lam langai gaw Czech Republic mungdan gaw lai wa sai 2009 ning, July shata hta Malaysia na Hkang tsinyam 40 jan hpe hkap la da sai re. Matut nna mung Malaysia tsinyam ni hpe hkap la na lam nga ai hpe shiga lawk hku nna, na chye lu ai. Czech mungdan hta shawng du nga sai anhte a kanau kajan gaw gara hku rai nga ai kun? ngu ai hpe NINGNAW shiga dap na Naura Shadang a san / htai da ai lamang hpe hti yu ga!

NINGNAW; Shawng nnan Ah Mi kaw na shachyen shaga ya rit.
Ah Mi; Shaga mying gaw Hparat Hkawn, Htinggaw myin gaw Hkalam, amyu gaw Marip Lama re. Awa, Rev.Hkalam Sam Son hte Anu, Sarama Daw Zung Nyaw hte rau Myitkyina kaw nga kaba wa ai. Annau ni yawng mali nga ai kaw na Kaba htum re.

NN; Ah Mi ya galaw nga ai lam ni hpe loi tsun dan rit!
Ah Mi; Uhm... Ya, Czech Republic mungdan a mare daju Prague kaw laika hpaji sharin hkam la nga ai. Ngai lung ai jawng mying gaw Charles University in Prague re. 1348 ning kaw na hpaw hpang da ai jawng re.

NN; Myen mung gara hpaji madang ngut da sai kun?
Ah Mi; Um…Myen mung asuya kaw na hpaw da ai dakkasu hpe gaw n lung ngut shi ai hku re. Second year (Psychology) sha naw ngut shi ai. Tim, M.I.T e hpaw da ai, B.A.R.S program hpe 2006 ning hta Social Studies Major hte jan mau lu da ai. Myitkyina Dakkasu hta jawng bai wa lung sha ngut na matu myit yaw shada da ai.

NN; Gara hku nna hpaji hkaja na matu Czech mungdan hpe lata ai rai?
Ah Mi; Czech's Ministry of Youth and Sport kaw na developing countries hkan na jawngma ni hpe jaw ai scholarship hte jawng lung na matu hkap la hkrum ai majaw Czech mungdan de du wa ai re. Bai nna, Tinang shawng kaw du taw ai ahkaw ahkang hpe ngang ngang magra akyu jashawn let yaw shada ai de du hkra lahkam na ngu ai myit a majaw re.

NN; Hpa baw subject hpe madung hka ja nga ai kun?
Ah Mi; International Economics and Political Studies re.

NN; Wunpawng Ramma law law gaw Chyum hpaji hpe madung hkaja ma ai. Ah Mi gaw hpa majaw ndai subject hpe lata ai rai?
Ah Mi; Myit lawm na lata ai re. Jawng Kaji kaw na ngai grai myit lawm ai. Awa ngai hpe galoi ma tsun ai ga langai nga ai “ Hpung sara/ma tai yang she Karai a sasana gun hpai ai nre ai, tinang galaw hkawm sa ai shani shagu na sak hkrung hkawm sa lam hta Hkristan kaja langai hku na sakse hkam hkawm sa ai mung sasana re.”

NN; Gara hku nna ndai jawng hpe lu lung ai kun?
Ah Mi; Karai Kasang a chyeju san san a majaw sha n-dai jawng kaw lu lung ai re.

NN; English laika hte seng nna yak hkak ai lam nga ai kun? Laika atsawm hkan lu ai kun?
Ah Mi; Um, N nga mat sai Sarama Kaba Ah Bu a chyeju a majaw ngai hta English laika hte seng na lak lak lai lai yak ai lam nnga ai hku re. Rai tim, M.A program hta nnan lung hpang ai shaloi laika gaw grai yak ai hku re. Nye a n-law n-la machye machyang a majaw sut masa hte mung masa hpaji ni hpe sharin hkam la hpang wa ai shaloi grai nan yak ai hku re. Manang ni hta grau aten jaw na hka ja ra ai, manang ni hta grau stress law ai hku re. Dai yak hkak ai ni kaw na nye matu grai manu dan ai hpaji ni hpe sharin hkam la lu ai majaw ngai grai myit dik ai.

NN; Ami ya jawng lung nga ai mungdan kaw tinang jinghpaw Wunpawng ramma kaga naw nga ai kun? Myen mung masha ni gaw nga ai kun?
Ah Mi; Prague, Charles University kaw jawng lung taw ai ngai hkrai re. Jinghpaw Wunpawng Ramma kaga n nga sai. Moi 2007-2008 Charles University Language Preparatory School kaw lung ai shaloi gaw Myan mung kaw na Karen jawng lung manang langai nga ai tim shi 2008 summer kaw Myanmung de nhtang wa mat sai. Jawng n lung ai Myen mung kaw na masha 50 jan ram nga ai. Hkang 40 jan (2009 ning July hkan kaw du wa ai ni rai ma ai) hte Myen 10 jan ram re.
Kalang lang Prague kaw nga ai People In Need NGO hte Film Academy kaw Myen mung kaw na Human Right Activists ni hte "Short documentary" gayet ai ni shata masum (shnr) laning mi Interns hku (shnr) learners hku sa ma ai.

NN; Ah Mi ni a jawng kaw hpa baw maigan amyu masha ni law ai rai?
Ah Mi; University ting kaw jawng ma 40,000 jan nga ai hku re. International jawng ma ni hta gaw American ni law dik htum re.
NN; Jinghku jingyu n nga ai maigan mungdan kaw langai hkrai nga ai shaloi yak hkak ai lam hpa nga ai kun?
Ah Mi; Yak hkak ai lam gaw hti ndang hkra nga ai hku re. CULTURE SHOCK hte HOME SICK gaw nye matu mang hkang kaba ni re.

NN; Jawng kade daram naw lung ra ai kun?
Ah Mi; One semester naw ra ai. Du na semester kaw gaw Thesis ka shangut sha rai sai.

NN; Ah Mi shinggan bungli ni mung galaw ai kun?
Ah Mi; Jawng lung ten hta gaw shinggan bungli n galaw byin ai. Summer kaw gaw ten daw chyen amu ni galaw byin ai. 2009 ning kaw Volunteer hku na gaw n-dai kaw du taw ai Hkang refugee ni kaw nye manang sasana sara hte rau shata mi kalang sa gawan byin ai. Shanhte myit kaji garen lam yawm na matu hte ra ai lam ni hta lu garum na matu. Ngut na nye manang ni galaw ai Homeless mission hta e shang lawm garum ai.
NN; Rau ai ten kaning re ai shara hkan wam hkawm chye ai rai?
Ah Mi; Rau ai ten ngai Laika buk seng kaba de sa na, ngai nlu mari hti ai laika buk ni sa hti dung dung re ai. Nu, Wa, kanau ni, bai nna ngai tsaw ra la ai nye kanu dim, manang ni hte shaga ai. Nye makau grup yin kaw na ngai tsaw ra ai, ngai hpe tsaw ra ai masha ni hpe aten jaw shaga ai hpe ngai ra sharawng ai.

NN; Jawng ngut jang hpa galaw mayu ai rai?
Ah Mi; Ngai sharin da ai hpaji hte nye makau grup yin a matu akyu rawng ai galaw mayu ai.

NN; Wunpawng ramma law law hpaji hparat lam hta myit mada ai daram hkaja na ahkang n lu ai ten maigan mungdan hta hpaji hka ja lu ai majaw gara hku hkam sha ai rai?
Ah Mi; Yak yak hkak hkak kaw na chyeju san san a majaw sha lu lung ai re majaw Wunpawng yawng a matu sha nrai, shingyim masha yawng a matu mu gun hpai na matu grau shakut ra ai ngu hkam sha ai. N-dai kaw maigan jawng lung ai ni sha chyeju hkam la ai ngu tsun mayu ai n re. Kaja nga yang, yawng hpe n bung ai chyeju kumhpa hpe Karai Wa gaw lajang da ya ai ngu hpe dum shangun mayu ai.

NN; Ya na zawn tinang a mungdan n re ai maigan mungdan de pru hkawm sa ai shaloi jawng laika n re ai sha kaga kaning re ai hpaji ni chye la lu ai kun?
Ah Mi; Sharin hkam la ai law law hta na lak lai ai langai gaw tinang hte nbung ai htung hkring, nga sat nga sa hta kaba wa ai masha amyu myu hte kanawn mazum chye wa ai. Shinggyim ahkaw ahkang hte seng na, masha langai hpe masha hku chye mu wa na matu sharin hkam la ai.

NN; Dai ni ramma law law dakkasu jawng ni hta nga ra na ten htingbu mungdan hkan tsinyam (refugee) hku nna nga pra let pu kan magam bungli shakut sha ra ai ni hpe gara hku tsun mayu ai rai?
Ah Mi; Tinang hkawm na ngu na lata da sai lam hta yak tim, dam dam nga tim, myit daw tim, shawng lam asin nga taw tim, myit n daw ai sha Karai Wa hta manoi let, ya lu taw ai ten hpe atsawm jai lang akyu jashawn hkawm sa yang kaja na re. Hpawt de na matu myit tsang taw na malai, dai ni na ten hpe atsawm sha kyu jashawn jai lang ai gaw grau mai kaja nga ai. Dai majaw myit n daw ga. Anhte yawng rau re ngu tsun mayu ai.

NN; Mungkan madang dep hpaji hpe tang du hkra hkaja lu ai Wunpawng ramma ni gaw grai naw yawm ai dai ni na ten hpaji chye ai Wunpawng Ramma ni a lit hpe kade daram chye na ai kun?
Ah Mi; Htaw lamau kaw na shata shagan ni yawng pawng let ning sin hpe ja htoi ai zawn anhte Wunpawng ramma ni yawng mung anhte a nsin chyip re Wunpawng shawng lam hpe jahtoi na matu lit nga nga ai. Solo travel nre sha yawng pawng let ja htoi ra ai ten du sai ngu mu ai.

NN; Malaysia kaw Wp tsinyam ni 4000 jan nga ai. Ndai kaw hpaji hparat hkaja mayu tim asak gaw kaba wa, ahkaw ahkang gaw n lu re ai ramma law law nga ai. Ndai ni hpe gara hku n-gun jaw mayu ai kun?
Ah Mi; Ngai kaw gaw hpa ahkaw ahkang, background mung n nga ai law, ngu nna hkum myit daw ngu tsun htet mayu ai. Tinang hkum tinang atsawm n yu ai sha gam maka hpe mara shagun taw yang gaw nsin tup re shawng lam hpe sha mu na, pru lam galoi n mu ai masha sha tai taw na re. Tsun mayu ai gaw, Shawng lam rawt jat lam chying hka gaw mu chye ai ni a matu galoi mung anga taw nga ai.
Ahkyak dik htum langai "Share" galaw dat mayu ai, anhte hta ya lu taw ai ya yang na ten hpe manu shadan let hkawm sa yang prat a manu dan lam hpe grau grau mu wa na re. Ngai grai ra ai Kung-fu Panda movie kaw na ga hpe quote galaw mayu ai “Yesterday is history, tomorrow is mystery, and today is a gift that’s why it is called present” da. Yawng tinang a gift hpe manu shadan jai lang lu ai ni tai u ga ngu Prague kaw na kyu hpyi dat ai law.

Malaysia Htawng na pru wa ai Shd. Zau Hkun hte san / htai

Malaysia Htawng na pru wa ai Shd. Zau Hkun hte san / htai

Tsa Doi La
NINGNAW, 20-April-2010

Malaysia mungdan hta tara n shang nga ai maigan masha law law jahkring hkring rim hkrum nga ai re. Ndai hta tsinyam masha ni mung tara n shang bu htawt masha (Illegal Migrant) hku masat hkrum ai majaw rim hkrum ai law law rai nga ai.

KRC Ningnaw shiga dap na Tsa Doi la kaw nna, illegal Migrant mara amu hte htawng rawng nna bai lawt pru wa ai KRC hpung shang masha Nhkum Zau Hkun hpe hkyuk htawng a lam san / htai galaw da ai re.

NN; Chyeju hte hkau na mying hte buga shachyen shaga ya rit.
Z.Hk; Shaga mying gaw Zau Hkun ngu ai re. Amyu gaw Nhkum rai ga ai. Myitkyina, Shatapru na re.

NN; Hkau Malaysia hkyuk htawng du mat ai hpe chye lu ai, gara shara kaw galoi rim hkrum ai rai kun?
Z.Hk; 2008 ning, October 10 ya shani, Jalan Imbi kaw rim hkrum ai re. Tara shang laika buk (Passport) n lu ai majaw hkyuk htawng du mat wa ai hku re.

NN; Balik ni hkau hpe rim ai hpang shawng nnan gara de woi mat ai kun?
Z.Hk; Dang Wangi Balik hkyuk de re. Dai kaw 2,3 ya sharawng da nna she Sungai boluh htawng kaba de bai sa ma ai.

NN; N-nan rim hkrum ai shaloi Balik hkyuk kaw gara hku hkam sha ra ai rai?
Z.Hk; E..e`.. n loi na hku re. Rim hkrum yang gaw le i! Ga gaw n hkrum, Myen mung masha re majaw mung grai yu kaji ai hku rai ma ai.

NN; Htawng de nnan du wa ai shaloi gaw zingri ai lam, adup bye ai lam ni nga ai kun?
Z.Hk; Dai gaw shanhte ndai htawng kaw, shanhte na htawng rule (rit kawp) ngu na kun, ndai langai hte langai dip lu dip sha, ndai Pyada ni mung Pyada hku, shanhte mungdan masha ni mung mungdan masha hku, grau nna anhte Myen mung masha ni hpe gaw tsawmra yu kaji ai hku rai ma ai. Bai htawng kata kaw mung masha amyu hpan hkum rawng ai rai di, ndai English ga ni Malay ga ni n chye yang gaw tsawm ra yak ai hku re.

NN; Hkyuk htawng kata lani mi hta shat lu sha gaw gara hku jaw sha ai kun? Hpa baw shat mai ni jaw sha ai kun?
Z.Hk; Htawng kaw gaw jahpawt rai yang hpalap jaw lu ai. 11:30 daram rai jang jahpawt shat jaw sha ai. Shana de 3:30 hta shana maga shat kalang bai jaw sha ai. Hkyuk htawng kata na shat lu sha mu jang lasha langai raitim myi prwi si pyi hkrat ai hku re. Ta layung mi daram sha re ai jum hkrai hkrai nga ai nga kasha hte shat lachyup mi re ai hpe plastic hte makai da ai. Dai hpe sha hpyan sha ra ai. Lani mi 2 lang re. Hka mung dai nam dum kaw tinang hka shin ai dai sha lu ra ai hku re.

NN; Htawng kata yup shara gaw gara hku rai kun?
Z.Hk; Anhte hpe gaw (taqmif) langai kaw nga da shangun ai rai yang, dai taqmif langai kaw gaw, marai 90 jan 100 nga ai. Yawng dun katsi (wrHwvif;) kaw yup hpreng nna yup ra ai hku re.

NN; Htawng kata kaw bungli shangun ai kun?
Z.Hk; Bungli gaw n shangun ma ai.

NN; Law malawng gaw kaning re ai tara tawt lai ai majaw du wa ai rai kun?
Z.Hk; Law malawng gaw illegal (tara n shang nga ai) majaw rim hkrum ai law ai. Nanghpam lu sha, lagut damya hte sat hkat ai ni yawng mung grai hkum ma ai.

NN; Hkau htawng rawng ai ten ladaw hta KRC ni (shnr), nta masha ni sa lu jahkrum ai kun?
Z.Hk; Htawng rawng shata 4 ladaw hta gaw KRC kaw na mung, nta masha ni mung n lu sa jahkrum ma ai. Hpa majaw nga yang htawng de sa yang Passport ra ai hku re. Passport lu tim pyi ga hpe atsawm chye shaga ai ni a matu she loi ma ai.

NN; Htawng kade na hkra rawng ra nna galoi bai lawt pru wa lu ai kun?
Z.Hk; Shata 4 rawng ngut ai hpang, 2009 ning, February 10 ya shani htawng kaw na lawt ai. Hpang shani, ngai gaw maigan masha re majaw Camp ngu ai de sa hkrum nngai. Dai kaw rai nga, jam jau ai, myit garen ai, kaja wa nan tinang a prat hpe gara hku hkawm sa ra na, gara hku nga ra na ngu ai hpe dai Camp kaw du ai shaloi she chye na wa ai hku re.

NN; Camp kaw aten ladaw kade na hkra rawng ra ai kun?
Z.Hk; Shata 7 jan rawng ra ai hku re. August (17), 2009 ya shani she camp kaw na lawt wa ai re.

NN; Camp hte Htawng gaw gara hku shai ai lam ni nga ai kun?
Z.Hk; Tsawm ra shai ai. Shabung pyi n mai ai hku re. Htawng kaw gaw shanhte Malay masha ni mung, maigan masha ni mung lawm ai majaw loi yu ai hku re. Camp ngu ai kaw gaw anhte zawn re ai maigan masha ni sha du ai. Htawng kaw na pru ai hpang Camp kaw du ai. Dai kaw du yang tinang hkum kaw kap ai palawng langai labu langai rau sha kata de mai shang ai. Dai kaw tinang hpe singgu krin yawng jep ngut jang she Block kata de bang ma ai. Mi htawng kaw gaw n-ba kasha, panep kasha ni jaw ai. Ya Camp kaw gaw n jaw sai. Dai hku katsi la ai dun kaw panep, n-ba, bunghkum n lawm ai sha, dusat zawn di hpreng di yup ra ai.
Camp kaw gaw anhte Myen mung masha ni law ai. Shawng e manghkang kaba byin ai majaw anhte hpe gaw aten kade na tim Thai jarit de n bawn sai. Banglar, India, Iraq, Nangiria, Indonisia kaw na hkawt, yawng hpe arau bang da ai re. Dai maigan masha ni gaw tinang a sumtsan dat kasa rung de matut mahkai nna n bungli lakmat mari nna wa mai ai. Raitim anhte Myenmung masha ni law law gaw lawu lam sa wa ai re majaw lawt lam n nga ai hku re. Tara shang sa nna rim hkrum ai ni hpe mung Myen mung kaw na lit la ai lam n nga ai hku re.

NN; Hkau Camp rawng ai ten tinang Wunpawng sha ni mung rawng ai nga ai kun?
Z.Hk; Lawm ai. Anhte nga ai gaw Block E du hkra manga nga ai rai yang anhte Block B kaw 2, A kaw 2, C kaw marai 4, D kaw 2, E kaw num sha marai 3, yawng rai yang Wunpawng marai 10 jan daram nga ga ai.

NN; Htawng rawng ai hte Camp rawng ai ten machyi makaw hkrum wa yang tsi tsi lajang ya ai hte seng nna gara hku shai ai kun?
Z.Hk; Htawng kata kaw gaw machyi ai nga yang masa hta hkan nna mai byin ai daram yu ya ai. Raitim Camp kaw gaw machyi nna marawn shaga tim n na masu su, sa pyi n sa ya ma ai. Dai hku zaw la shingdang nna rawng da ma ai. Machyi htan wa nna grai sawng ai daram rai jang she Peracetamol langai daram jaw sha ma ai. Bai nna dai hku dun katsi kaw she hpreng nna yup ai majaw hkam n kaja wa ai. Jahkring hkring machyi wa ai. Marai langai jahkru yang yawng jahkru wa ai. Marai langai myi machyi yang yawng kaw bra nna yawng machyi ai. E... Dai zawn re tsi hpyi sha tim n jaw sha ai. Shanhte kaw tsi gawk ngu shamying da ai mung gaw nga ma ai. Raitim kalang ma n woi sa ai.

NN; Camp kaw rawng ai ten gaw KRC kaw na sa jahkrum ai lam nga ai kun?
Z.Hk; Nga ai. Ngai rawng ai shata 7 ladaw laman hta 2 lang sa jahkrum sai hku re.

NN; Dai zawn rai KRC kaw na sa du gawan ai ten hta hpa baw ni sa madi shadaw da ai kun?
Z.Hk; N-gun jaw ga sa tsun ma ai. Malu masha hte sapya zawn re ai ni sa jaw ai. Bai nna, tinang a amu mabyin hta hkan nna lawt pru lu na lam hpe gara hku tam yang mai na mahkrun hpe jawm jahkrup ai.

NN; Camp kaw na lawt wa ai gaw KRC a shakut shaja lawm ai majaw kun? (Shnr) Tinang hkrai gumhpraw ma hkam nna lawt wa ai hku kun?
Z.Hk; E.. Ndai Camp kaw na gaw gumhpraw kade lu ai wa raitim, n lu le na shadu ai. Hpa majaw nga yang gumhpraw rau hkan mung n mai ai. Ngai Jinghpaw rai yang, nye a gawng malai KRC ngu ai Uhpung uhpawng nga ai. KRC kaw nna she nye a malai UNHCR de hpyi nem ya na. UNHCR kaw na she seng ang ai Asuya hpe bai tsun na. Ndai mahkrun hku sha lawt mai ai re majaw KRC gaw ahkyak ai re ngu hkam la ai.

NN; Ya na zawn Malaysia kaw tsinyam tai nna htawng hkrat mat ai majaw gara hku hkam sha ai kun?
Z.Hk; E. Ndai Htawng kaw nga ai hte Camp kaw nga ai gaw grai shai ai re. Grau nna Camp kaw rai jang makam masham hkum, masha hpan hkum ai majaw grai chye kanawn ra ai. Tinang atsawm n rai yang mung atsawm n rai ai zawn manang ni shut ai mara mung tinang a mara tai wa ai. Sadi sahka hte grai chye nga ra ai. Grai chye shaga ra ai.

NN; Ya na zawn Malaysia kaw tsinyam sa tai ai a marang hkam sha ra ai hkyuk htawng tsinyam hte seng nna gara hku mu mada ai rai?
Z.Hk; Anhte ya na zawn Malaysia kaw tsinyam tai ra ai ten hkyuk htawng ngu ai hpe myit mung myit da, yen mung yen da, mai byin ai daram dingman ai hku sak hkrung hkawm sa yang gaw n hkrum sha na re ngu shadu ai. Karai Kasang makawp maga na hpe kam ai.

NN; Hkau hku nna Malaysia kaw nga ai tinang Wunpawng myu sha ni hpe gara hku htet mayu ai kun?
Z.Hk; Tsun ga nga yang anhte shada tsawra myit grai madun ra na hku re. Myit mung grai kaba ra na re. Hpa majaw i nga yang tinang rau amyu n bung ai, makam masham mung n bung ai mungdan kaw tinang na amyu tinang na rusai ngu ai gaw lachyawk mi daram sha nga ai majaw grai myit hkrum ra na re ngu kam ai. Hpa bungli raitim, shada jawm jahkrum ti, byin wa ai manghkang hpe mung shada jawm jahkrum, sharai la, shada sharin shaga madi shadaw rai yang gaw kaja na re.

NN; Kaga tsun mayu ai lam nga ai kun?
Z.Hk; Htawng kaw naw ngam nga ai anhte a manang ni, Wunpawng sai daw sai chyen grai naw nga ai. Matut nan shawng de rim hkrum ai ni mung nga wa na re. Shanhte hpe lu garum ai ngu gaw anhte a matu mai kaja dik ai lam re. Law malawng gaw dum n ta masha ni Myenmung de she re majaw n-dai kaw nga nga ai anhte ni shada yu gawn hkat ra na re.
Hkyuk htawng na lawt hkra garum lu ai gaw UN rai na re. Raitim UN hpe shadut jahkat na hte garum shingtau lu na gaw KRC re. Dai majaw KRC ningbaw ningla ni kaw nna, Karai Kasang a myi man yu let, tinang Wunpawng myusha tsinyam ni hpe matut nna naw garum la marit ngu ga saw mayu nngai.

NN;; Ya na zawn Balik Hkyuk, Htawng mahkrum madup lam hpe myit galu kalang htai ya ai majaw NINGNAW JOURNAL kaw na grai chyeju kaba sai hku re.
Z.Hk; Ngai mung grai chyeju kaba sai.